في الدرس الأول يعطي طارق الجندي أول ثلاثة تمارين لتطوير العزف بالريشة في اليد اليمنى ، الهدف من التمارين بشكل عام هو أن يعتاد العازف على الحركة الصحيحة للريشة من خلال تكرار هذه التمارين التي يجب على العازف المواظبة عليها بشكل يومي و البدء بسرعة بطيئة و زيادة سرعة العزف تدريجياً للوصول إلى سرعة عالية.
طارق الجندي:
"مرحبا ، أنا طارق الجندي من اعزف دوت كوم و اليوم بهاي الحصة راح نتعرف على بعض تمارين الريشة و الاشكال الايقاعية اللي منقدر نطبقها على الأوتار و على بعض السلالم و منستخدمها كتمارين تحماية يومية.
التمرين الأول ، نتطلع علي الصفحة عنا ، أول شكل اللي هي ترويولي الثلاثية و ترويولي زي ما هي مبينة عنا لازم تكون : داون أب داون بعدين داون أب داون إذا عم نعمل تنين ترويولي ورا بعض فهي : (يعزف طارق التمرين) داون ، أب، داون ، داون ، أب، داون.
نحاول نعملها علي وتر الصول بشكل بطيء : ون ، تو (يعزف طارق التمرين) و منلاحظ إنه في عندي آكسنت نبر قوي بكون على بداية كل وحدة فهي : ترو يو لي ، ترو يو لي ، و راح أعلمكم اليوم شوية رموز هندية و هاي الرموز الهندية كمان عشان تفرجينا بعض الاشكال الايقاعية اللي هي شاذة شوي ، فترويولي بسموها : تا كا تيه تا كا تيه (يعزف طارق التمرين) في عندي آكسنت صغير ، و راح نطبق هاي التمارين على سلم العجم و منقدر نطبقها على جميع السلالم اللي منعرفها .
نتطلع على التمرين الأول اللي هو على شكل ال تا كا تيه أو تر يو لي : ون ، تو (يعزف طارق التمرين كاملاً). ملاحظتين مهمين للتمارين ، أول اشي ، لازم نتمرن بدون فيبراتو ما بصير إيدي الشمال تكون بهالشكل (يعزف طارق التمرين مع الفيبراتو ليبين الطريقة الخاطئة) هدا الحكي غلط لإنه هدا بفقدنا الحس بالنوتة وين هي بالزبط فلازم نتمرن بدون فيبراتو واحد، الشغلة التانية زاوية ريشتي لازم تكون خمسة و أربعين (يوضح طارق بشكل عملي) بهالشكل، ما تكون تسعين (بين بين الزاوية بين) زاوية الريشة والوتر لازم تكون خمسة و أربعين مش تسعين ، هاي (التسعين) ما بتحققلي البور (القوة) و السرعة ، هاي (مشيراً إلى الخمسة و أربعين) بتحقق بور و سرعة.
فلو بدي أسرع أنا هادا التمرين راح يصير بهالشكل : ون ، تو : (يعزف طارق التمرين بسرعة أكبر) . راح أسجل كل التمرينات بسرعات بطيئة عشان نقدر بعدين في ما بعد نقدر نسرعها بشكل تدريجي. و أهم إشي إنه ما نتمرن على التمارين هاي بسرعة كبيرة لازم نبلش نتمرن عليها بطيء و بنصح في هاي المرحلة إنه نتمرن باستخدام ميترونوم. تمرين رقم اتنين: نتطلع عنا بالورقة موجود عندي : تا فا تي في تا فا تي في أو بالهندي : تا كا دي مي تا كا دي مي وهلا راح تشوفوا ليش احنا راح نبلش نحكي بالهندي .
تا فا تي في زي ما احنا منعرفها هي داون أب داون أب ، تا فا تي في ، فهي نيجي نتطلع على التمرين اللي على وتر الصول (يعزف طارق التمرين) بهالشكل ، و بعدين نيجي نتطلع على التمرين اللي موجود عندي : ون، تو : (يعزف طارق التمرين كاملاً) . ملاحظة مهمة : بدي أحاول أخفف من الطاقة اللي أنا ببذلها هون ، فمثلاً لما بعمل صول (طارق يعزف) ، لا (طارق يعزف) ، سي (طارق يعزف) بدي أكور ايدي عشان الدو (طارق يعزف) بخلي ايدي ثابتة على ال سي عشانني راح أرجعلها ، ما بعمل (يبين طارق عملياً الطريقة الخاطئة) مش بهالشكل لا ، (يبين طارق الطريقة الصحيحة في عزف التمرين) و راح تشوفوا إنه العزف بسرعة بتطلب راحة أكتر من العزف بشكل بطيء. تمرين رقم تلاتة : زي مهو موجود عنا في الورقة هي علامة ال تا تي في تا تي في و برجع بذكركم إنه ال تا تي في هي داون داون أب (يعزف طارق موضحاً) ف تا تي في تا تي في ورا بعض (طارق يعزف) و إذا بسرعها زي ما راح أسرع كل التمارين بشكل تدريجي بتصير (طارق يعزف مع زيادة السرعة بشكل تدريجي) ، و التمارين هاي أنا اخترتها لإنها بتعطي مرونة للرسغ بس هاي المرونة ما راح تيجي بين يوم و ليلة راح تيجي بالتمرين المستمر و رفع السرعة بشكل متدرج فال تا تي في ما راح نتمرن عليها هلا بهادا الشكل بالعكس راح نتمرن عليها (طارق يعزف) تا تي في تا تي في بهالشكل منطبق التمرين على سلم العجم و برجع بذكر إنه منقدر نطبق هاي التمارين على كل السلالم اللي منعرفها ، ون ، تو : (يعزف طارق التمرين كاملاً).
هاي تمارين مهمة لسبب: الاشكال الايقاعية إذا أنا بمرن ريشتي عليها بهادا الشكل حتى لو كان ممل بعض الشيء بس بعدين بتشوفوا قديش إنه الريشة بتكتسب هاي المرونة."