في الدرس الثاني يعطي طارق الجندي تمرينين جديدين لتطوير العزف بالريشة في اليد اليمنى ، الهدف من التمارين بشكل عام هو أن يعتاد العازف على الحركة الصحيحة للريشة من خلال تكرار هذه التمارين التي يجب على العازف المواظبة عليها بشكل يومي و البدء بسرعة بطيئة و زيادة سرعة العزف تدريجياً للوصول إلى سرعة عالية 

طارق الجندي:

"تمرين رقم أربعة: هو على العلامة اللي هي عكس ال تا تي في، اللي هي منسميها تا فا تي، وريشتها بتكون داون أب داون: تا فا تي (يعزف الأستاذ طارق التمرين) بهذا الشكل. فهي رح تكون عندي تا فا تي، تا فا تي. نتمرّن عليها بطيء (يعزف الأستاذ طارق التمرين). بعد مدة مثلا أسبوع منحاول بعدين بتسرع (يعزف الأستاذ طارق التمرين بشكل أسرع) بهالشكل.

نيجي نتطلع على التمرين رح أسجل بشكل بطيء وبعدين انتوا بتحاولوا تسرعوه بشكل تدريجي ون، تو: (يعزف الأستاذ طارق التمرين). وبدي أحكي شغلة كمان أنا عن هاي التمارين هاي التمارين إلها أشكال ثابتة إذا إحنا عم منشوف مثلاَ مرات عم منعمل ال تا تي في داون أب، أب داون أو ال تا فا تي داون أب داون وهاي الأشكال هي اللي بتحقق أكبر سرعة ممكنة لأشكال الريشة، وممكن تجربوا أشكال تانية بس رح تشوفوا وتكتشفوا أنه هاي الأشكال هي أسهل الأشكال اللي موجودة اللي ممكن تحقق لي أكبر سرعة ممكنة في كل المقطوعات. تمرين رقم خمسة: وهلأ رح نبلش بالمصطلحات الهندية وإن شاء الله من هون لآخر الكورس كل الشباب رح تكون بتحكي بالهندي، في عنا هاي الخماسية؛ الخماسية خمس ضربات بزمن ال تا بزمن الضربة الوحدة، وهاي منحكيلها با كا غي نا تُن. با كا غي نا تُن هي عبارة عن (يقرأ الأستاذ طارق التنمرين قراءة إيقاعية).

ورح تشوفوا أنه رح نبلش نعاني من شوية صعوبة صغيرة والسبب هو أنه إحنا مُخنا متعود دايما يقسم على شغلات زوجية، بس لما نبلش نتعود على الفردي وعلى الأُود تايم سيجنيتشرز (اللي هي الموازين الغير معهودة رح نشوف أنه بتصير الموضوع أنه هديك الأشكال بتصير أسهل بالنسبة لإلنا. نيجي نتطلع على ال با كا غي نا تُن بشكل كتير بطيء وما حد يسرعها على وتر الصول: ون، تو: (يقرأ الأستاذ طارق التنمرين قراءة إيقاعية)، منعمل آكسنت با كا غي نا تُن (يكمل القراءة). وبالمناسبة هاي تمارين الريشة كتير كويسة كمان بتنعمل على كل الأوتار، يعني مش بس على الصول، أنا عم بعملها على الصول بس منقدر نعملها عل رّيه ومنقدر نعملها عل لا، شو منستفيد! منستفيد أنه زاوية الريشة تبعنا بتكون قادرة تاخد كل الأوتار لأنه زاوية الريشة وزاوية الرسغ هون على وتر ال دو الغليظ (يعزف الأستاذ طارق) وحساسية هذا الوتر بتختلف عن هاي الزاوية عن حساسية هذا الوتر (يعزف الأستاذ طارق) بهالشكل. با كا غي نا تُن نشوف التمرين تبع ال دو ميجر عجم ال دو ون، تو (يعزف الأستاذ طارق التمرين).

وصّلنا مازورة رقم ثمانية، بدي أوقف شوي بس بدي أحكيلكم شغلة: ممكن أنه نتمرّن عشان الهاي القواعد كلها ترسخ فينا نحكي وإحنا منتمرّن يعني خليني أبلّش بالمازورة رقم تسعة، ون، تو: (يقرأ الأستاذ طارق التنمرين قراءة إيقاعية). وممكن إني أزقفهم وتشوفوا إني بعمل سمول آكسنت على أول كل نبر عشان أحاول إني أحسّس فيه."