في هذا الدرس نتناول الإيقاعات ذات الثلاث عدات 3\4 و 6\8 . نأخذ إيقاع الفالتس ثم إيقاع الدارج . ينصح ناصر الطالب/الطالبة أن لا يتقدم للدرس التالي إلا بعد إتقان تدريبات هذا الدرس و الأخذ بالنصائح الواردة فيه.
ناصر سلامة:
"مرحبا أنا ناصر سلامة من إعزف دوت كوم وهدا الدرس رقم سطعش لآلة الطبلة.
في الحصص الماضية كنا نعد بشكل تنين وأربعة وتمنية وعدينا في الحصة الماضية للعشرة عشان ناخد الإيقاع السماعي الثقيل، في المرة هاي نعد للتلاتة رح نكون الإيقاعات اللي منعزفها اللي منستعملها هي إيقاعات مبنية على العد من تلت أضلاع أو من تلت عدّات.
أول إيقاع رح نحكي فيه هو إيقاع الفالس وهو إيقاع مشهور كتير في عليه رقصات كتيرة في أوروبا منستعمله كمان في الموسيقى العربية تبعتنا. إيقاع الفالس عبارة عن تلت ضربات دُم تك تك دُم تك تك هو من الإيقاعات الأساسية أنا في العادة بعلّم هدا الإيقاع بالحصص الأولى لكن أنا عم بحاول أدرج في هدا المكان أو في هدا النوع من الدروس بحاول أتدرج وأدرج بشكل تسلسلي لتصاعد الإيقاعات بالأعداد تبعتها والأوزان تبعتها.
أنا هلأ رح أحكي عن الوزن تلاتة على أربعة وبعدين أنتقل بعديها لوزن ست أتمان أو ست ضربات خلينا نعزف بالأول تلت أرباع اللي هو إيقاع الفالس (يعزف الأستاذ ناصر التمرين على الطبلة ويقرؤه قراءة إيقاعية).
إيقاع الفالس ممكن برضه أستخدم إيدي اليمين (يعزف الأستاذ ناصر التمرين على الطبلة).
زي ما شفنا إيقاع الفالس بتكوّن من تلت ضربات لكن في كتير مناطق بقدر ألعب وأزخرف فيها في إيقاع الفالس لأنه ضرباته واضحة وثابتة (يعزف الأستاذ ناصر التمرين على الطبلة) ون تو ثري واحد تنين تلاتة أوكي فإيقاع الفالس إيقاع بسيط إيقاع سهل عدُّه ثلاثي واحد تنين تلاتة هلأ إيقاع الفالس هو إيقاع أنتوا رح تصيروا تمزجوا بينه وبين التمرين اللي أخدناه في حصة رقم تنين اللي هو (يعزف الأستاذ ناصر التمرين على الطبلة ويقرؤه قراءة إيقاعية).
هدا التمرين هو عبارة عن تلت ضربات لكن معدود مرتين واحد تنين (يقرأ الأستاذ ناصر التمرين قراءة إيقاعية ومع العد) بدنا نتحول هلأ من هدا التمرين لإيقاع الفالس واحد تنين (يعزف الأستاذ ناصر التمرين على الطبلة مع العد).
لازم ننتبه لهذا الفرق بين هدول التمرينين ما بصير يكون التكات زمنهم وعددهم نفس العدد بين التلت أرباع والربعين أو بين الضربتين والتلت ضربات.
أوكي مننتقل هلأ لإيقاع اسمه الدارج وهدا إيقاع يستخدم في الموسيقى العربية والموسيقى الشرقية بشكل كتير كبير اللي بنعد من ست عدات دُم تك تك دُم تك إس (يقرأ الأستاذ ناصر التمرين قراءة إيقاعية) دُم تك تك بالبداية هو فالس دُم تك إس الفرق هون أنه التك التانية في إيقاع الفالس اللي هو اللفة التانية منها اعتبرناها إس فبصير (يعزف الأستاذ ناصر التمرين على الطبلة ويقرؤه قراءة إيقاعية) هيك منكون أخدنا اليوم تلت أرباع وست أتمان.
الحصة الجاي رح ندخل في إيقاعات مركبة أكتر وأكتر.
أرجوكم هدول التمارين احفظوهم تمرنوا عليهم بوقت بسمح لإنكم تحفظوهم والإيقاعات لازم تحفظوهم عن غيب. شكراً إلكم وبشوفكم في إعزف دوت كوم."
