تذكير سريع بكيفية إشتقاق المقام الفرعي , تعلم مقام البوسليك , ما هي درجة "البوسليك" , مفهوم التصوير , تعلم مقام "الفرحفزا" , تعلم مقام "سلطاني ياكاه" , جنس حجاز , تعلم مقام العشاق المصري , جنس البيات.
ريبال خضري:
"ليوم بدنا نحكي عن مشتقات أو فروع مقام النهاوند و حنحكي عنهن بشكل سريع و مقام النهاوند أساساً أعتقد من أكتر المقامات اللي تستعمل بالعصر الحديث، هو و الكرد أكتر مقامين حالياً بنسمعهم بالأغاني الدارجه.
هلأ من المقامات اللي نحنا قلنا دائماً بيكون عنا تلات أشكال لتغيير المقام، إما إن نحنا نغير بمكان الركوز فيصير عنا أجناس جديده بدون ما نعدل شي بالمقام، أو نغير بأجناس المقام نفسها يعني نخلي الجنس الأدنى و نعدل الجنس الأعلى، أو بإن يكون المقام هو نفسه تصوير على غير درجه.
لو إجينا نشوف مثلاً من هادا النمط حنلاقي إن عنا مثال هادا الشي مثلاً البوسليك، مقام البوسليك، مقام البوسليك هو مقام يعادل النهاوند و لكن من الراي، نحنا نهاوند الدو هو هيك (يقرأ الأستاذ ريبال التمرين قراءة ايقاعية)، بنفس الركوز عالدو عالصول، نفس الشي بينتقل بالراي بيصير عندي الركوز راي لا، لإن ارتفعنا درجه و بيصير عندي أنا عم بحكي على نفس المقام بس من أعلى (يقرأ الأستاذ ريبال التمرين قراءة ايقاعية).
إشي بنسميه تصوير أو بيسموه بالموسيقى الغربيه ترانس بوزيشن، غير مقام البوسليك عنا بقا من المقامات ياللي بنغير فيها بنضيف عليها مثلاً أجناس بس بدون ما نضيف عليها شي، اللي هو مثلاً متل مقام الفرحفزا (يعزف الأستاذ ريبال التمرين)، مقام الفرحفزا هو نحنا عم بنحكي عن نهاوند صول اللي هو بيكون عنا السي بي مول المي بي مول، و لكن الإختلاف إن أنا بيكون عندي، نحنا عادةً عنا بيكون النهاوند الأولى و كرد الخامسه، نهاوند صول و كرد إذا كنا نهاوند الدو فهو نهاوند دو كرد صول، هلأ نحنا بنهاوند الصول فتحنا بي حيكون لأجناس عنا نهاوند صول مع كرد راي، هلأ اللي بينضاف عليهم بالفرحفزا إن نحنا بنقدر نعمل عجم على السي بي مول، طبعاً نحنا ما بنحتاج نعدل أي علامه لإن هي نفسها الموازيه للعجم، نحنا قلنا العجم بنقدر ناخد منه النهاوند بسادسته، فنحنا لو شفنا السي بي مول، سي دو راي مي فا صول، هي سادسته، فإذاً نحنا هادا العجم بيطلع بدون ما إن نعدل أي علامه، متل هيك بيكون (يقرأ الأستاذ ريبال التمرين قراءة ايقاعية).
أخدت تلات أجناس حاولت أستقر عليهم، هادا بالنسبه لمقام الفرحفزا، مقام السلطاني يكاه اللي هو بيشبه نحنا الماينر الغربي، هن تلات أنواع واحد من الأنواع هاي اللي بنسميه الماينر الهارموني اللي هو بيكون (يقرأ الأستاذ ريبال التمرين قراءة ايقاعية)، بيكون الجنس التاني هو جنس حجاز مش جنس كرد، بيكون شوي حزين أكتر، الكرد بيكون (يعزف الأستاذ ريبال التمرين)، الحجاز بيكون (يقرأ الأستاذ ريبال التمرين قراءة ايقاعية).
كإن عم بحس أدان، فبالنسبه لمقام السلطاني يكاه هو عملياً نهاوند طبيعي بس جنسه التاني حجاز مش كرد، فبالتالي بس هو بيكون الرسو تبعه من الصول بيكون بهادا الشكل (يقرأ الأستاذ ريبال التمرين قراءة ايقاعية)، هاي جنس النهاوند الصول، هلأ (يقرأ الأستاذ ريبال التمرين قراءة ايقاعية).
رجعت على نهاوند الصول، فينا ناخد مثال عليها (يقرأ الأستاذ ريبال التمرين قراءة ايقاعية)، عم باخد جنس النهاوند مع جنس حجاز، بيصفى عندي كمان في عندي مقام من المقامات اللي نحنا بنعدل على الأجناس، بنغير الجنس التاني اللي هو مقام العشاق المصري (يعزف الأستاذ ريبال التمرين)، اللي هو كتير دارج خاصةً بالموسيقى المصريه و حتى الحديثه، هو عباره عن نهاوند راي متل البوسليك بالضبط بس بيفرق إن أنا بدل ما آخد كرد عالخامسه بعدل إني آخد بيات، بيات طبعاً راح يمرق معنا فيما بعد متله متل الكرد، البيات هو مقام فيه علامات شرقيه فبيكون (يقرأ الأستاذ ريبال التمرين قراءة ايقاعية)، هاي نهاوند على الراي (يقرأ الأستاذ ريبال التمرين قراءة ايقاعية).
عملت بيات لا و رجعت نهاوند راي، كإني عم بحكي على مقام كإني عم بحكي على يا مسافر وحدك بالمقطع التالي مثلاً (يقرأ الأستاذ ريبال التمرين قراءة ايقاعية)، بعدين (يقرأ الأستاذ ريبال التمرين قراءة ايقاعية).
رجعت كإني نهاوند بيات نهاوند، هاي بالنسبه لأكتر المقامات المشهوره عن المتفرعه عن النهاوند، طبعاً أنا متل ما ذكرت سابقاً، أيّ مقام نحنا بنقدر إن نحنا بس نعدل شوي بالأجناس بتركيبتها، نغير الجنس الأعلى، بس بيبقى دائماً الجنس الأدنى هو الأساس لنقول إن هادا المقام متفرع من المقام الأساسي.
الدرس الجاي بشوفكن بنحكي عن مقام الرست و مشتقات منه، باي."
