تعريف بمقام الرست أو "أبو المقامات" أو "سيّد المقامات" , المقامات الشرقية , كيفية تمييز مقام الرست , الرست و أم كلثوم , الرست و نجاة الصغيرة , إحساس مقام الرست و العلامة الشرقية " الكار بيمول" و "نصف بيمول" و "نصف دييز" , ثلاث أرباع البعد و ربع البعد.
ريبال خضري:
"مرحبا، أنا ريبال من إعزف دوت كوم.
اليوم حناخد درس مختلف كلياً، راح يكون درسنا عن مقام جديد هو مقام الرست، قبل ما نبتدي، أكيد بطلب من كل حدا عم بيحضرنا هلأ اللي هو يعمل تمارين الفوكاليز اللي نحنا طبقناهم بالدروس الماضيه.
طبعاً بعد تمارين الفوكاليز راح نبلش شويه نسمع إشي مختلف، حنسمع أشياء من مقام شوي جديد اللي هو مقام الرست (يعزف الأستاذ ريبال التمرين).
طبعاً متل ما سمعتوا، مقام الرست اللي راح نحكي عنه اليوم هو مقام شرقي مختلف كلياً عن مقامي العجم و النهاوند، لو حقيقةً نحنا جربنا ندرس مقام الرست بين العجم و النهاوند راح نقدر نلاقي وجه تطابق أو وجه تشابه بيناتهن، يمكن الدارس أو اللي بيقدر يقرأ نوت أكتر يقدر الفرق المختلف شو الفارق بين هدول التلات مقامات، راح أترك الدراسه النظريه للدرس القادم، راح إحكي هلأ عن كيف أنا ممكن إني أميز مقام الرست، هلأ أول شغله إذا بدنا نحكي عن مقام الرست، فمقام الرست بالموسيقى العربيه يدعى هو أبو المقامات أو سيد المقامات.
طبعاً إسم سيد المقامات إجا من فكرة إن هو كتير شرقي كتير بحت، أي مغني حابب يغني شي صعب شي شرقي صعب دائماً بيلجأ لمقام الرست، أهم الأعمال اللي عملتها السيّده أم كلثوم و اللي عملتها نجاة الصغيره حتى ياللي عملتها السيده ورده اللي انعملت من عبد الحليم، أهم الأعمال كانت على مقام الرست، هلأ لو إجينا ناخد هيك تشابه بس كإستماع، مقام العجم لما حنا كنا نسمعه، كنا نسمعه (يعزف الأستاذ ريبال التمرين)، كنا نحس (يقرأ الأستاذ ريبال التمرين قراءة ايقاعية).
نحنا حطينا بوقتها قلنا إن ممكن نعطيه إحساس دريميا و إحساس حلم، هلأ بالنهاوند لما انتقلنا بالنهاوند كنا نقول في إحساس حزين (يقرأ الأستاذ ريبال التمرين قراءة ايقاعية)، هلأ مقام الرست الإختلاف في إن هو بنحس بنوع من في علامه من العلامات بنسميها علامه شرقيه، لو إجينا نحنا نتطلع على كيف تسلسل علامات سلم أو مقام الرست فبنلاقي إن تقريباً هي مشابهه لسلم العجم اللي هو ما بيكون عنا اي تحويل بالدرجات، بيختلف عنا إن بيكون عنا درجة المي هي درجة النصف بي مول أو الكار بي مول، درجة السي بتكون درجة نصف بي مول كار بي مول، هلأ عادةً ببعض بأكتر المراجع بيقولوا نحنا إن سلم الرست بيختلف صعوده عن هبوطه بعني إحنا لما نقول (يقرأ الأستاذ ريبال التمرين قراءة ايقاعية)، أو خلينا نقولها بالدو (يقرأ الأستاذ ريبال التمرين قراءة ايقاعية).
المشكل حيكون عند السي (يقرأ الأستاذ ريبال التمرين قراءة ايقاعية)، كان السي بالصعود كانت كار بي مول، بالهبوط كانت علامة بي مول، هلأ لو إجينا بدنا نحكي عن مقام الرست أو نعمل فوكاليز، راح نلاقي بكل بساطه فينا نعمل المقام نفسه بس راح يختلف علينا شي كتير بسيط، إن نحنا من قبل كنا نقدر نطبق الفوكاليز على البيانو، ليه؟ لإن البيانو كتير سهل التعامل معه، غير هيك البيانو عباره عن لوحه ثابته أنا قادر أتعامل معها.
أما بالمقامات الشرقيه لما بيدخل عندي كار بي مول أو نصف بي مول أو نصف دييز فحيصير عندي الحركة أصعب شوي، ليه؟ لإن لو جربنا مثلاً نشوف إن نحنا لما بنطلع من الدو للدو حيكون عنا مي نص بي مول و سي نص بي مول، بس لو مثلاً أنا جربت إني أطلع من المي بي مول أو الإي فلات بدي إطلع أعمل سلم راس حيختلف عندي كتير حيصير عندي العزف كتير أصعب.
طبعاً سبب تاني و اللي هو السبب أكيد الرئيسي اللي هو إن آلة البيانو أساساً هي معموله أو مجبوله لحتى يكون الأبعاد بين علاماتها هي فقط نصف بعد، ما في عنا إشي إسمه تلات أرباع بعد أو ربع بعد، أما بآلة العود فنحنا بتستعمل آلات بنستعمل الفواصل تلات أرباع البعد أو ممكن أحياناً بشكل قليل جداً إن نحنا نستعمل الربع البعد و لكن بيكون طبعاً بشكل عارض غالباً أكتر ما إن يكون بشكل أساسي.
حنجرب نعمل فوكاليز عالمقام نفسه (يقرأ الأستاذ ريبال التمرين قراءة ايقاعية)، حنقول آآآآ، بنتذكر إن آآآآ دائماً لازم تكون عند أسناني مش عند بطني، نفسي دائماً باخده لبطني بعدين (يقرأ الأستاذ ريبال التمرين قراءة ايقاعية)."
