تذكير بقالب الموشح و تركيبة الموشحات , تعلم غناء موشح " يا غزالا قد جفاني" , نوتة موشح " يا غزالا قد جفاني" , نصائح عن تجميل الغناء عند إعادة الجمل الغنائية كإضافة العرب و غيرها.
ريبال خضري:
"مرحبا، أنا ريبال من إعزف دوت كوم.
بالدرس الأخير اليوم راح نحكي عن التلات مقامات ياللي نحنا أخدناهن، حنتناقش بموشحات على هدول المقامات، حنختار لكل مقام من المقامات الرئيسيه ياللي أخدناها العجم النهاوند الرست حنختار موشح.
بذكركم نحنا حكينا عن قالب الموشح أول ما ابتدينا بالدرس يمكن تمانيه أو تسعه حكينا إن الموشح هو عباره عن عادةً بيكون قالب تقليدي عادةً بيكون بسيط بيكون مكتوب بأوزان مختلفه عن الأوزان السبعطعش للفراهيدي، عادةً الموشحات بتكون عباره عن تو ميلودي أو لحنين أساسيّين، بيكون عندي الشطر الأول على هادا اللحن، الشطر التاني على نفس اللحن، الشطر التالت بيتغير اللحن، الشطر الرابع بيرجع عندي اللحن الأساسي.
هلأ كتسميه عادةً يسمى المقطع الأول دور أول، المقطع التاني دور تاني، المقطع التالت ياللي بيتغير فيه اللحن بنسميه خانه، و المقطع الأخير بنسميه غطاء و طبعاً هو بيرجع فيه اللحن، لو إجينا نصنفهن راح نلاقي إن المقطع الأول هو أي، المقطع التاني هو بي هو أي كمان، المقطع التالت هو بي، المقطع الرابع نحنا بنرجع لنفس اللحن فإذاً كمان هو أي، حنشوف أول موشح اليوم حنحكي عنه هو موشح يا غزالاً قد جافاني (يعزف الأستاذ ريبال التمرين)، طبعاً أنا راح آخد الموشح على نهاوند راي (يقرأ الأستاذ ريبال التمرين قراءة ايقاعية).
طبعاً لو لاحظتوا أنا دائماً كان عندي لحنين بالأول عندي (يقرأ الأستاذ ريبال التمرين قراءة ايقاعية)، بالتاني (يقرأ الأستاذ ريبال التمرين قراءة ايقاعية)، كمان عدت نفس اللحن، بينما التالت كان عندي (يقرأ الأستاذ ريبال التمرين قراءة ايقاعية).
كان عندي لحن مختلف، رجعت بالأخير رجعت عدت أول مقطع، هلأ ضروري أنبه عفكرة إن أنا لما بعيد شغله بعيد جمله لحنيه برجع بعيدها مره أو مره أو غير، كل مرّه لازم إني أنا أضيف عليها شي مني أنا من إحساسي أنا كمغني، يُفضل إني أضيف دفاعاً، يُفضل إني أضيف تباعاً، يعني مش منطقي إن أنا مباشرةً من تاني مره إعاده أعمل عرب أو حليات أو أحلي كتير بالصوت و أعمل ألحان جديده تكون يعني كتير بعيده عن اللحن لأ، ممكن أول مره أضيف شي تالت مره أضيف شي رابع مره أضيف أكتر من شي لحتى يتغير يحس الشخص بإن أنا عندي أفق بالتلحين حتى و أنا عم بغني."
