شرح لغناء موشح على مقام العجم , تعلم غناء موشح " من ليصب في الهوى" , نوتة موشح " من ليصب في الهوى" ,تذكير بتمارين اللفظ الصحيح.
ريبال خضري:
"حنشوف الموشح التاني ياللي هو على مقام العجم اللي هو شوي أصعب.
طبعاً بيصفى إني بس أنبه بشي على الموشح القديم إن الموشح القديم الوزن تبعه لو لاحظنا النوت هو سته على تمانيه، اللي هو نحنا سبق يمكن حكينا على هادا الموضوع إن المقامات الأوزان البسيطه بتكون عادةً تلاته على أربعه أو عفواً تلاته أو تنين أو أربعه.
الأوزان المشتقه أو المركبه بنسميها اللي هي بتيجي البسط بالمقام ضرب تلاته على تنين، فسته عتمانيه هو مشتق المقام الثنائي، يعني أنا عم بقول ون تو ثري، ون تو ثري (يقرأ الأستاذ ريبال التمرين قراءة ايقاعية)، فبكون عندي (يقرأ الأستاذ ريبال التمرين قراءة ايقاعية)، هاي بالنسبه لهادا الموشح.
الموشح التاني ياللي راح نحكي عنه هو موشح مغلي صبين، الموشح كلامه شوي صعب، نحنا بنحتاج لإن نعمل التمرين ياللي حكينا عليه عاللفظ إن نحط القلم بتمنا و نجرب إن نحنا نلفظ الحروف واحد واحد بيدون ما يكون في أي غلط لحد ما يتعود الدماغ على اللفظ السليم لهدول الحروف، أنا راح آخد هادا الموشح على مقام عجم الدو (يقرأ الأستاذ ريبال التمرين قراءة ايقاعية).
طبعاً هادا يعد من أصعب الموشحات العربيه بحكم إن هو فيه مساحه كتير كبيره بالصوت، هلأ لو لاحظتوا أنا غنيته و غنيت قبله موشح و غنيت و أنا قاعد و رغم هيك ما حسيت بالتعب لسبب كتير أساسي إني أنا عم بقدر آخد نفسي صح، ما عم بغني بحنجرتي بأسلوب إن هي يتعبها تماماً بحيث إن بعد عشر دقايق أحس حالي ما عم بقدر أغني صح، كتير ضروري إن دائماً صوتي يطلع لبرا، الحروف عم بتفتح عم بتاخد حقها الطبيعي فبهيك حاله أكيد الحنجره ما راح تتعب التعب القاسي ياللي ما بسمحلها إن تكفي لفتره طويله.
طبعاً في مصطلحين مروا معنا ضمن هادا الموشح ياللي هم مصطلحين جانيم همريم، هدول المصطلحات من المصطلحات المأخوده من الدوله العثمانيه من العصر التركي، بعضن منها بنلاقيه بضمن و بعضها ضمن الأدوار، في متل جانيم متل همريم متل أمام متل يليل، أكترها تعود لهاي الفتره."
