في هذا الدرس يتناول ناصر موضوع إضافة أصوات لل”تك” وعرض وشرح بعض الايقاعات الشرقية وتعليمها. ينصح ناصرالطالب/الطالبة أن لا يتقدم للدرس التالي إلا بعد إتقان تدريبات هذا الدرس و الأخذ بالنصائح الواردة فيه.

ناصر سلامة:

"مرحبا أنا ناصر من إعزف دوت كوم واليوم هو الدرس التالت في آلة الإيقاع أو في آلة الطبلة.

اليوم رح نحكي عن موضوعين؛ الموضوع الأول إضافة أصوات للتك اللي أخدناه الحصة الماضية وبدنا نبدا نحكي في الإيقاعات، الإيقاعات الشرقية بدنا نبلش نتعلم الإيقاعات الشرقية شو هي الإيقاعات الشرقية إيش هي الأوزان وإيش هي الأرتام المستخدمة.

أول إشي خلينا نحكي عن التكات التك اليمين تك الإيد اليمين خصوصاً رح ندخل شوي أكتر في تكنيك يضاف لزيادة السرعة في التكات كلنا أو نتزكر الحصة الماضية كان عنا هذا التمرين (يعزف الأستاذ ناصر التمرين على الطبلة). الحصة هاي رح نعمل التمرين دبل يعني (يعزف الأستاذ ناصر التمرين على الطبلة) مرتين يمين مرتين شمال (يعزف الأستاذ ناصر التمرين على الطبلة بسرعة تدريجيا).

هذا التمرين بفيدنا بسرعة الإيدين بفيدنا بتكنيك أكتر إحنا هلأ بلشنا نمشي هذا التمرين تمرين مهم ويجب ممارسته طول الوقت، أنا لحد هلأ كناصر سلامة لما بدي أعمل تسخين أو إحماء أو وورم أب أنا ببلش بهذا التمرين قبل أي عزف. فهذا التمرين بضله مستمر معانا في أي وقت إحنا بدنا نعمل عزف لازم يكون عنا إحماء عشان تكون إيدنا جاهزة ومرونتها عالية فهاي التمارين كتير مهمة اللي هي (يعزف الأستاذ ناصر التمرين على الطبلة) أوكي.

هلأ رح ننتقل للشق مش التمارين رح نبلش نحكي في الإيقاعات. بكل لكل أغنية أو لكل قطعة موسيقية أو لكل قطعة مؤلفة لازم يكون في إيقاع ماشية عليه القطعة ما القطعة ما بتكون ماشية بفراغ ممكن تكون ماشية بتعد للتنين ممكن تكون ماشية إنك بتعد للتلاتة ممكن تعد للعشرة وممكن تعد للسبعطعش ممكن تعد للعشرين لكن في حياتنا البسيطة بدنا نبدا بداية بسيطة بهذا الموضوع في حياتنا إحنا بمجتمعاتنا العد للتنين في الموسيقى هو أكتر عد مألوف.

من إيقاعات اللي بتنعد لتنين وكلنا سامعينه أو كلنا يعني كلنا متعرضين لهذا لإيقاع إيقاع اسمه إيقاع الزار أو إيقاع الأيوب. إيقاع الأيوب بيحتوي إحنا حكينا في دُم وفي تك في مرحلة بتيجي بإنك إنت بتكون مرات مضطر إنك توقف يكون في ريست أو سكتة أو بسموها في نوت الموسيقى إس. إيقاع الأيوب هو إيقاع (يعزف الأستاذ ناصر التمرين على الطبلة) تعوا نحلله؛ دُم إس دُم تك، دُم إس دُم تك هو عبارة عن أربع عدات دُم إس دُم تك، دُم إس دُم تك، دُم سكتة دُم تك، دُم .. دُم تك، دُم .. دُم تك، نتزكر دايما أنه وظيفة الإيقاع أنه يحافظ على السرعة ما بصير أنا أبدا التمرين دُم إس دُم تك، دُم إس دُم تك ما بصير التسريع، التسريع بهاي الطريقة لازم أول إشي أحافظ على سرعتي بتأكد أنه الإيقاع طلع معي بشكل مناسب بسرعة مناسبة وبعدين ببلش أنتقل إذا أنا عم بتمرن في التسريع. لكن خلال الموسيقى إذا ما في اتفاق على التسريع لازم تضلها السرعة ثابتة وواضحة.

نرجع لإيقاع الأيوب دُم إس دم تك (يعزف الأستاذ ناصر التمرين على الطبلة) دُم سكتة دُم تك (يعزف الأستاذ ناصر التمرين على الطبلة ويقرؤه قراءة إيقاعية) دُم .. دُم تك (يعزف الأستاذ ناصر التمرين على الطبلة ويقرؤه قراءة إيقاعية) دُم .. دُم تك (يعزف الأستاذ ناصر التمرين على الطبلة) أوكي.

هلأ منيجي منحاول نلاقي طرق لكيف نعبّي هاي السكتة. إحنا قلنا قبل قبل الحصة هاي في الحصة الماضية كان عنا في تمرين (يعزف الأستاذ ناصر التمرين على الطبلة) إذا بتتزكروا، هلأ هذا التمرين اللي هو تردد التك مرتين ورا بعض ممكن يكون محل ال إس دُم إس دُم تك دُم تا تا دُم تك دُم تا تا دُم تك تزكروا أنه منعد في نفس السرعة ولحد تنين تلاتة أربعة دُم تا تا تلاتة أربعة ون تا تا تلاتة أربعة منعمله دُم تا تا دُم تك (يعزف الأستاذ ناصر التمرين على الطبلة ويقرؤه قراءة إيقاعية). هلأ بدنا ندخّل التك للإيد اليمين دُم تا تا دُم تك (يعزف الأستاذ ناصر التمرين على الطبلة ويقرؤه قراءة إيقاعية).

الحصة الجاي رح نتعلم كيف نطلع صوت جديد على آلة الطبلة، استنونا في إعزف دوت كوم وأنا ناصر سلامة."