في الدرس الخامس نتعرف على كوردين جديدين و هما الـ سي و الـ جي و على كيفية التمرن على هذين الكوردين باستخدام كوردات تعلمناها سابقا مثل ال إي ماينور.

جورج النجار:

"اهلا فيكم مع اعزف دوت كوم , انا جورج النجار وهادا درسنا الخامس في البوب جيتار.

رايحين نحكي اليوم عن كوردين جداد لازم نتمرن عليهم ، وبنتعلمهم ، عشان الاغاني والعزف رح تيجي بعد هيك ، هم اسمهم ، هاي شكلهم مبدئيا G (يعزف الاستاذ جورج التمرين ) او G ماجور وال C (يعزف الاستاذ جورج التمرين ) او ال C ماجور وهدول الكوردين الجداد بيختلفو عن الكوردات الي حكينا فيهم ، بالسابق لانه في بالكوردات الي حكينا فيهم بالسابق فيهم ميزه ، انو الاصابع قريبين دايما من بعض.

يعني في ال A ماجور كانو الاصابع ملزقين في بعض كذلك الامر في ال E ماينور كان في عندي اصبعين ملزقين في بعض ، في ال E ماجور صار كثير قريب ، حتى انت بتلاحظ انو في النقل بين ال A ماجور وال E ماجور بتفكر فيها الاصبع هادابيجي هون والاصبعين هدول بيجو هون وكأنهم اصبع واحد ، ايدي كمان قريبنين انما بالكورد الجديد ال G بهالشكل ، واول ايشي بلفت انتباهي انو هادا الاصبع جاي هون وهاض جاب هون ، تحت هناك.

لكن بالحقيقة هدول الكوردات مش صعبة ، بس بدهم شوي ، يعني هي مرحلة تانية ، بعد ما صار عنا تحكم شوي بالكوردات ، احنا قادرين نتحكم اكتر بالاصبعين هدول ونجيب واحد هيك واخد هيك ، طيب شكل ال G كالاتي ، الاصبع الاول بيجي عالوتر الخامس ، بالخانة التانية يعني ، هي الخانة التانية الاصبع هون ، واحد اتنين تلاتة اربعه خمسة ، هسا الاصبع التاني بيجي عالسادس ، الخانة التالتة ، والتالت بيجي عالوتر او عالخانة التالتة ، هيك هيك هيك ، ( يعزف الاستاذ جورج التمرين ).

طبعا وضع الاصبع هاضا السهل وهاضا كمان سهل لكن في البداية بكون شوي مزعج ، في ناس حتى بيحاولو بيعملو هدول التنين ، بيحاولو يثبتو هاض الاصبع باستخدام اليد التانية ، لكن تخفوش مع التمارين رح يصير في ليونة هون في الاصبع ، ( يعزف الاستاذ جورج التمرين ).

التمارين طبعا زي ما حكينا بالسابق ، حتى الواحد يكون ، يضيف الكورد بشكل فعلي ، لقاموس الكوردات الي عندو لازم يمرن معاه كوردات اخرى ، مش امسك ال G واضلني اعيد اعيد ، مش رح ينفعني بايشي ، ف كورد احنا كثيررح نتمرن ونجيبو معو هو ال E ماينور ( يعزف الاستاذ جورج التمرين ).

في قضية هون رح تبلش تصير معنا الي هي ، انو الواحد رح يشكي انو الصوت مش طالع معي مزبوط ، موضوع انو الصوت مش طالع معي مزبوط ، الها كذا سبب بس انا بشوفو احد الاسباب الي لما واحد يكون ماسك الكورد وعلى الوتر ( يعزف الاستاذ جورج التمرين ) سبب الحكي هادا انو لما انا بمسك وتر معين على خانة معينة ، لازم قدر الامكان اجيب الاصبع قريب لاخر خانة ، لعند الحديدة ، مثلا لو انا بدي امسك الوتر السادس ، على الخانة التالتة لازم بالاصبع التاني اعيد ، لازم قدر الامكان اقرب الاصبع للحديدة هاي الصوت نضيف مش صوت اصلا ، فلم بدو يمسكو هون ، لم حدا بيحاول يمسك هون بيكون في كثير صعوبات بحاول انو يجيب هادا الاصبع مزبوط وهادا مزبوط ، سهل انو ينسى انو لازم يكونو قريبين من هون ، فاذا بدي امسك هون ( يعزف الاستاذ جورج التمرين ) بدي اضغط اكثر ( يعزف الاستاذ جورج التمرين ) لازم اضغط بقوة هائلة ( يعزف الاستاذ جورج التمرين ).

حتى اجيب الصوت مزبوط هادا مش مزبوط الحكي ، فاذا بدي اضغط شوي صغيرة ، ( يعزف الاستاذ جورج التمرين ) وبدي بس احط اصابعي بالوضع المزبوط ، انا مش ضاغط زيادة ، انا بس بدي بنفس القوة ( يعزف الاستاذ جورج التمرين ) صار الصوت مرتب ( يعزف الاستاذ جورج التمرين ) الكورد الثاني هو ال C ماجور هادا شكلو بنترك هادا الوتر فاضي الوتر الاول عالوتر التاني انا بحط اصبعي الاول على الخانة الاولى ( يعزف الاستاذ جورج التمرين ) هسا بترك الوتر التالت وبجيب الاصبع التاني على الخانة التانية زي الدرج شكلو ( يعزف الاستاذ جورج التمرين ) وهسا بجيب الاصبع التالت على الوتر الخامس ( يعزف الاستاذ جورج التمرين ).

برضو لمن اتمرن على كورد ال C ماجور كورد حلو اني استخدمه ك ( يعزف الاستاذ جورج التمرين ) كورد التاني ال e ماينور فبدنا نتمرن عال G ماجور بعدين E ماينور وعال C ماجور مع ال E ماينور ( يعزف الاستاذ جورج التمرين ) ببطئ وموضوع اني اسرع النقلة لازم اراعي شغلتين ، اولا لازم اعزف بشكل كثير بطيء بايدي اليمين ( يقرأ الاستاذ جورج التمرين قراءة ايقاعية ) او حتى ابطا هاي الطلب الاول لازم يكون كثير بطيء اثنين ، لازم ما اوقف ايدي اليمين اثناء مانا قاعد بنقل الكورد حتى لو كورد مش جاهز مثال ال G مع ال E ( يعزف الاستاذ جورج التمرين ) ( يقرأ الاستاذ جورج التمرين قراءة ايقاعية ).

اتمرنو عالكوردات هدول كتير منيح عشان نقدر نتابع الدرس الجاي."