يقدم نزار الإيقاع الأول للدورة و هو إيقاع الملفوف أو لف و يعطي النصائح و التمرينات على هذا الإيقاع.

نزار الحمود:

"مرحبا أنا نزار من إعزف دوت كوم. واليوم بدرسنا الخامس رح نتعلم إيقاع، وأخيراً رح نبلش نعزف.

هذا الإيقاع سمعناه كتير سمعنا في الشارع، سمعناه فالزفات، سمعناه في الحفلات، سمعناه في الأغاني، يعني دانّا كتير متعودة عليه.

هذا الإيقاع اسمه إيقاع الملفوف، أو اللف، مكون برضه زي ما حكينا من قبل من ضربتين أساسيات اللي هم الدُم والتك، يعني بنشوف هيك إنه كل الدروس اللي تعلمناها من قبل طلعت إلها داعي يعني، مش إنه والله التمرين خلص إنه تمرين وبزهق وهيك وخلص، لأ، التمرين كان إله داعي إنه هلأ عم بيعرفني على هذا الإيقاع، هذا الإيقاع خلينا نحكي سهل جداً ، وممتع جداً وكتير بنقدر نشكله، هلأ شو يعني نشكله؟ يعني ما نلعبه بصوته الأساسي، شو هو صوته الأساسي؟ يعني الضربات الأساسية، الضربات الأساسية لهذا الإيقاع هو هيك (يعزف الأستاذ نزار التمرين).

نلاحظ إنه دوم تك تك دوم ... (يقرأ الأستاذ نزار التمرين قراءة إيقاعية) عشان هيك أصلاً اسمه ملفوف، لأنه عم تحس حالك بتلف بتلف بدائرة يعني، طبعاً لما بدي أعزف الإيقاع ما بدي أنسى اللي تعلمته من قبل يعني ما بدي ألعب الدُم هيك، وألعب التك هيك، بحيث إنه يصير يتغير أصلاً شكل الإيقاع و إسم الإيقاع، يعني مش إنه، ما بدي كمان نفس ما حكيت إنه يكون الإيقاع مرة سريع، مرة بطئ، مرة سريع، مرة بطئ، يعني مش إنه، لأ، هيك إذا كان في حدا عم بعزف معنا زي ما بحكوا بفوت بالحيط، يعني بخربط، بدنا إياه يكون، نكون نحنا القائدين أو الزعماء في الفرقة الموسيقية، يعني بدونّا الفرقة الموسيقية رح توقع.

هذا الإيقاع فرايحي، يعني ما بزبط أعزفه كتير بطئ، يعني لإنه بستخدموه بالحفلات، بستخدموه بالأعراس، بستخدموه بالزفات، ما بزبط إني ألعبه في مثلاً بأربعين ضربة بالدقيقة، أو بستين ضربة بالدقيقة، لإنه رح يكون ممل، والناس ما رح ترقص على أربعين ضربة بالدقيقة، أو على إيقاع بطئ، عشان هيك رح نتعلمه ونعزفه عالمترونوم بسرعة ثمنين ضربة بالدقيقة، يعني هيك، واحد تنين، دم تك تك واحد تنين دم واحد تنين، أوكي، وين ممكن نسمع هذا الإيقاع؟ بأغنية مثلاً بكثير من الأغاني مبدئياً، بكثير من الأغاني اللي بنسمعها كل يوم من الأغاني التراثية، من أغاني المطربين المشهورين، وحدة من الأغاني مثلاً المعروفة، وين ع رام الله، وين ع رام الله وين ع رام الله ولفي يا مسافر وين ع رام الله، لو بدي أتخليها مثلاً رح تكون تاررارا رر حلو، هلأ كتير طبعاً أغاني معزوفة بهذا الإيقاع، زي ما حكيت لكم وين ع رام الله، لو بدكم، معكمش حدا بيعزف آلة ثانية ممكن أسمعها أي محل ثاني، ممكن زي ما عملت أنا، حتى لو صوتي مش حلو، زي صوتي، إذا صوتك مش حلو زي صوتي، ممكن إنك تدندن معها وتعزف، يعني تاررااارر ...، دندنوا مع الأغنية وإعزفوا، ما تخافوا ما في إشي بخوف.

هيك بنكون تعلمنا أول أيقاع في هاي الدورة، إسمه إيقاع الملفوف، خلينا نتقنه كتير كتير منيح وندرب عليه منيح منيح، عشان لما تيجي حفلة أو يجي عرس، نقدر نعزف مع العزّيفة، وبشوفكم الدرس الجاي. شكراً."