يعطي نزار تمرينات مهمة على الزمن و يتحدث أيضا عن الميترونوم.

نزار الحمود:

"مرحبا أنا نزار من إعزف دوت كوم. واليوم رح نتابع اللي تعلمنا في الحصة الماضية.

الحصة الماضية لو تذكرنا هيك بشكل سريع حكينا كيف نعزف صوت الدُم بالإيد اليمين إنه نترك الإبهام على حفة الطبلة ونتذكر إنه جلدة الطبلة كأنها إشي سخن، ونعزف على الدُم بهذا الشكل، وأخذنا فالحصة الماضية تمرين إنه كيف نعزف صوت الدُم من خلال العد للأربعة زي هيك واحد تنين ثلاث أربعة.

بس ممكن أنا وعم بعزف بعد أسرع أو بعد أبطئ، عشان هيك بيجي عنا الجهاز اللي حكينا عنه فالحصة الأولى اللي هو المترونوم اللي هو هدفه إنه يضبط الإيقاع أو يضبط يعني يعطيني زي العد، هلأ المترونوم موجود من زمان مع تطور التكنولوجيا صار موجود على الموبايلات، صار موجود على الكمبيوترات، صار موجود على على وين ما بدكم ك كتكنولوجيا، عشان هيك ممكن إنه نستخدمه من خلال تطبيق على أي موبايل موجود معنا، رح نستخدم اليوم أو نسمع صوت المترونوم رح يكون ستين ضربة بالدقيقة، هلأ هو المترونوم بالعادة بيعطينا كم عدة بالدقيقة نحنا بنحتاج إنه نسمع هذا كأبسط طريقة.

يعني مثلاً لو بدنا نعمل ستين ضربة بالدقيقة هيك بكون صوت ... لو بدنا نسرع هذا دبل السرعة يعني مية وعشرين ضربة بالدقيقة، خلينا نرجع على الستين ضربة بالدقيقة اللي هو هاد، ليش بستعمل ستين عشان إذا ما كان عنا مترونوم متوفر بقدر أخلى المترونوم تبعي هو عقرب الثواني الموجود في الساعة، لإنه عقرب الثواني اللي موجود بالساعة هو ستين ضربة بالدقيقة يعني لو ما عندي مترونوم أنا بقدر أستعمل الساعة اللي موجودة عندي بالبيت، لو هلأ بدنا نبلش نعزف رح نسمع كالتالي.

رح نعمل التمرين إنه نضرب الدُمات أربع مرات بستين ضربة بالدقيقة، واحد تنين ثلاث أربعة، تمام هلأ أنا أتقنت ال أربع ضربات بصوت مثالي اللي كل الضربات كان عندي نفس الشكل، يعني ممكن أبدا واحد مثلاً واحد تنين ثلاث أربعة ،كل صوت يطلع معي شكل صوت يطلع عالي واطي ما في أي مشكلة، بس المشكلة إني أسرع وانتقل لسرعة أسرع، وأنا لسا البطئ مش عامله، هلأ خلينا ناخذ نفس التمرين بس بأسرع يعني مش ستين ضربة بالثانية، خلينا نعملهم مية وعشرين ضربة بالثانية، يعني دبل السرعة، أو ضعف السرعة، بهذا العد رح يكون هيك واحد تنين ثلاث اربعة، واحد تنين ثلاث أربعة، تمام، وبرضه نفس الإشي إذا حسيت حالي لما أسرعت صار عندي ضعف أو خلل أو الصوت طلع معي مش نقي أو مش واضح، ممكن إني أنزل بالسرعة، يعني الستين كان معي تمام، صار الصوت واضح صار الصوت متقن عم بطلع نفس الصوت، بطلع معي نفس درجة الصوت، لما انتقلت للمية وعشرين لقيت حالي عم بخربط عم بضرب ضربات خطأ، أو يعني بطريقة خاطئة جداً، لأ، خليني أنزل للمية، إذا لقيت المية سريعة علي وعم بعمل الضربات خطأ برجع للثمنين، تمنين صارت تمام بدّرج بالسرعة أسرع وأسرع وأسرع حتى أصل السرعة اللي أنا بوقف عندها بشكل تمام، إحنا مش هدفنا السرعة في هاي التمارين، هدفنا إنه نطلع الصوت بطريقة نقية وواضحة مية بالمية.

بهيك بيكون خلص الجزء الثاني والدرس الثالث من هاي الدورة وبشوفكم بالدرس اللي بعده، وشكراً."