ينتقل نزار الى مرحلة أكثر صعوبة و يعطي تعليمات لإصدار صوت التك من اليد اليسرى.

نزار الحمود:

"مرحبا أنا نزار من إعزف دوت كوم. واليوم رح نكمل دورة الطبلة بحصتنا السادسة.

اليوم رح ناخد درس شوي صعب، يعني في تحدّي وهيك حلو، اللي هو إيش رح نعمل فيه اليوم، اليوم أخيراً رح نبلش نعزف بالإيد الشمال.

الإيد الشمال رح تعزف اليوم، التك هي نقسها اللي إخدناها التك بإيدنا اليمين اللي هي إذا بنتذكر هيك، اليوم رح نطلع نفس الصوت باستخدام الإيد الشمال، هلأ الإيد الشمال بالعادة إذا إنت يمّيني يعني إنت بتكتب باليمين وهيك، بتكون الإيد الشمال شوي أضعف، فعشان هيك هذا الدرس إحنا حكينا إنه في تحدي وصعوبة، بس ما في مشكلة أولها رح تلاقيه صعب، ورح يطلع الصوت مش حلو، ورح يطلع غلط، ومش رح يطلع نفس الصوت اللي بيطلع معي هلأ.

بس عادي، هذا أحلى إشي في درس اليوم، إنه من ولا إشي رح تبلش تعمل صوت بتحسه بالأول صعب، خلينا نبدا، التك بالإيد الشمال، خلينا نسمع أول كيف، هيك.

أوكي، كيف بنعزف هذا التك؟ التك بالإيد الشمال مبدئياً بالإيد الشمال بالإصبع الثاني يعني واحد تنين ، بهذا الأصبع بالعقلة الأولى من الأصبع، زي هيك يعني إذا بدي آجي أمسكه يعني أحمل بس هاي العقلة من الأصبع وأحطها على الطبلة وأرفعه على حفة الطبلة تماماً زي هون بالزبط، لما كنًا نحط العقلة بالأصبع اللي بالنص على الطبلة ونرفع، ونضرب نفس العملية، بدي أجيبها هاي العقلة وأحطها على الطبلة، وأعمل هيك، هلأ إذا إجيت أنا من أولها حطيت إيدي هيك عالطبلة و رفعت، رح تلاقوا إنه في صعوبة، يعني ما رح يطلع معكم بهاي العملية، ليه؟ لأنه العصب والعضلة وكل إشي اللي موجود هون كثير أضعف من الإيد اليمين، بس كيف بنقدر نتمرن عشان نوصل لهاي المرحلة؟

بالمرحلة الأولى بدنا نعمل إشي أسهل إنا نرفع كل إيدنا، زي هيك، هلأ بس أرفع إيدي خليها زي ما بحكوا تسقط سقوط حر على راحتها، يعني هيك، هلأ عم بيجي بالأول ما بدي أهتم، إجى هذا الجزء على الطرف الطبلة أو أجى بالنص ولّا هاد مش هاممني ، بس إذا أنا قاعد قعدتي الصحيحة وزي ما بتذكر طبلتي واثقة من نفسها، خلص تمام، إذا طبلتي تمام مية بالمية، أنا بدي أرفع إيدي بهذا الشكل وأنزل أرخي ما بهمني إذا أولها بطلع الصوت تمام أو لأ، طيب ممكن كمان نسهل الموضوع أ سهل وأسهل، نقسم هاي الحركة كاملة لقسمين الأول أرفع إيدي الثاني وانا عم بنزل اوقف هذا الجزء على الطبلة وانزل.

زي ما ملاحظين أنا مرات بخلي الصوت عم يطلع واضح، ومرات لأ، عشان أفرجيكم كيف رح يطلع معكم، يعني، تمام، صار الصوت شوي عم بيوضح أكثر، خليني هلأ أبلش من هون، مش أنا عملت واحد أول إشي، بعدين واحد تنين ثلاث، لأ، خليني من هون أبدا، من عند ما بتكون إيدي مرتكزة على الطبلة ملاحظين الصوت مرة عم بطلع واضح، مرة مش عم بطلع واضح، أوكي، هلأ عم بصير أحسن، عم برفع كل إيدي، عم بصير أحسن، لحد ما أصير كتير تمام، بصير أحكي أوف صرت يعني ممتاز، خليني هلأ بس أحرك أصبعي أشوف بقدر ولا لأ.

ملاحظين بس اصبعي اللي عم بتحرك، بطّلت ايدي من عند الكوع، بطّل رسغي، بطّل إشي،، بس اصبعي، طيب كالعادة، بعد ما احترفنا التك الشمال، هلأ شو بدنا نعمل؟

بدنا ناخد تمرين، التمرين تتذكروا اللي عملنا دوم تك تك وعجقنا الدُم مع التك وخلطناهم مع بعض، هلأ بدنا نعمل التك اليمين مع التك الشمال، رح تكون سرعة المترونوم ستين ضربة بالدقيقة زي ما تعودنا في البداية عشان اذا ما كانش معي المترونوم أقدر إني أسمع صوت العقرب الثواني وأقدر أمشي معه، نشوف كيف بطلع؟ واحد تنين ثلاثة أربعة، تمام، طبعاً زي ما حكينا دايماً إنه بعد الستين ممكن أنقل على ضربات أسرع من هيك.

ورح تلاحظوا في كل نهاية درس رح يكون مثلاً مكتوب تمرين الإضافي اسم التمرين بكل درس مثلاً بكون مختلف، هذا التمرين نحنا بكون عاملين إشي زيه تقريباً بس هذا بتركه إلكم إنتوا عشان تعملوه وتستفيدوا منه، يعني مثلاً فلنفرض إنه إحنا هلأ عملنا ستين نفرض إنه بدنا نسرع واحد تنين ثلاث أربعة، مثلاً طبعاً على سرعة مترونوم نحنا بنختارها من لما بنشوف تمرين إضافي مثلاً بنحكي لعب التك تبادل بسرعة مثلاً مية وستين هذا الإشي أنا مثلاً مش رح أكون عازفه مثلاً ، أو مش رح أكون مفرجيكم إياه بس في إشي شبيه إله فإنتوا بتعملوه، هذا يعني عشان يخليكم تتمرنوا أكثر وتتمكنوا من الصوت بشكل أوضح، مراجعة سريعة كتير لصوت التك، بنبلش فيه بالإيد الشمال بالأصبع الثاني واحد تنين بالعقلة الأولى بنرفع بالبداية إيدنا كلها، بالبداية ممكن ما يطلعش معنا الصوت نفس الإشي، الخطوة الثانية إني بزت إيدي وبخلي كف الإيد يضرب من هون وبنزل، والخطوة التالية بخلي إيدي كلها ثابتة، وآخر إشي لما بصير ممتاز فيها بصير بس أصبعي يتحرك.

بدنا نلاحظ كمان ممكن إشي ما أكون ذكرناه إنه من وين بلعب التك؟ يعني مش من هون ولا من هون، وين بتيجي إيدي لما بتكون أنا قاعد قعدتي الصح، وحاطط كوعي هيك على طرف الطبلة هيك من هون، رح تيجي بالزبط بالزبط يعني إذا بدي أقسم الطبلة هيك من النص، رح تيجي بالزبط هون هيك، خلينا كمان نتذكر تمرين اللي هو تبادل خلينا دايماً نوصل مثلاً لسرعة معينة، بعدها مش قادر أنا أسرع أكثر، خليني أثبت عليها أسبوع أسبوعين مش فارق، بعديها بنتقل للسرعة اللي بعديها وبرضه خليني أتذكر إنه التمرين الإضافي هو تمرين إنتوا بدكم تعملوه، أخذنا زيه من قبل و عشان تستفيدوا منه أكثر.

وهيك بتكون إيش خلصت الحصة السادسة الصعبة من هذه الدورة، شكراً."