يشرح نزار بالتفصيل كيفية إصدار صوت الدم من الطبلة و يعطي النصائح و التمرينات اللازمة.

نزار الحمود:

"مرحبا أنا نزار من إعزف دوت كوم. واليوم رح نبدا حصتنا الثالثة من دورتنا دورة الطبلة.

اليوم أخيراً رح نبلش نعزف ونتعرف على صوتين الرئيسين اللي بتشكل منهم أي إيقاع موجود في العالم، ورح نتعرف كمان على كيف نعزفهم بالإيد اليمين، الإيد الشمال حالياً رح نأجل شغلها لإنه بدها شوية وقت.

طبعاً زي ما تعرفنا بالدرس الماضي كيف كيف نقعد وكيف الطريقة السليمة لمسك الطبلة نرفع رجلنا ونضم رجلنا اليمن بهذا الشكل على الطبلة ونتاكد إنها واثقة من نفسها. رح نتعرف اليوم على صوتين رئيسين، الصوت الأول إسمه الدُم صوته يعزف بهذا الشكل، صوت الدُم زي ما إنتوا لاحظتوا معي نعزفه بالإيد اليمين بيكون كف الإيد مبسوط بهذا الشكل مفتوح مش مشدود ولا مرخي، عادي بفتح إيدي بحيث إني بقدر بإيدي الشمال أحرك أصابعي بكل سلاسة، حلو لهيك أنا حركتهم خلص معناته إيدي مرخية بفتح إيدي بهذا الشكل الإبهام مش ملزق الإيد إبهام مفصول عن الإيد والأصابع الأربعة ملزقين ببعض كأنهم وحدة واحدة، يعني أنا بفصل الأيد لجزئين بهذا الخط إيد الجزء الاول مقسوم للأربع أصابع كأنهم وحدة واحدة، والأيد والجزء الثاني اللي هو الإبهام، الجزء الأول اللي همن الأربع أصابع بحطهم على الطبلة، والجزء الثاني الإبهام بيجي على حفة الطبلة بالزبط يعني ما بفوت على الطبلة وما بيلامس جزءه اللي بنستعمله لإصدار الصوت أو جلدة الطبلة، فأنا برخي بحط الجزء الثاني اللي حكينا عنه بحطه على طرف الطبلة، والجزء الأول بحطه على الطبلة وبتركها مرخية، كيف بعد ما عرفنا كيف بنحط إيدنا على جلدة الطبلة كيف أنا بقدر أصدر هذا الصوت من الطبلة.

هلأ برفع إيدي بشكل كامل كلها من عند الكوع لتحت كأنها جزء واحد هيك، برفع إيدي وبنزلها على الطبلة، الخطأ اللي بوقع فيه كثير من الناس أنه برفع إيده تماماً بيكون حاط الإبهام على طرف الطبلة وأصابعه على الجلدة من هون، برفع رسغه بس تنزل على الطبلة بيترك إيده على جلدة الطبلة فبيكتم الصوت.

هلأ الدُم هو صوت ارتداد إيدي عن الطبلة، كلمة ارتداد فأنا لازم اشيل إيدي عن الطبلة، كثير بسهل علينا لو نعرف فكرة إنه لو نتخيل إنه جلدة الطبلة هي إشي ساحن محطوط على الغاز لو بدي أجي ألمسه كيف رح ألمسه، رح أحط إيدي عليه بسرعة وأشيلها بشكل سريع عشان ما تنحرق إيدي، نفس الإشي، لو تخيلت إنه هاي جلدة الطبلة هو إشي ساخن مجرد إني ما أحط إيدي عليه لازم أشيلها بسرعة، ولازم يطلع عندي هذا الصوت، هلاً أنا ممكن أتمرن على الدُم، هلأ ممكن الناس كتير يحكوا إنه طب ما هذا صوت سهل وأنا بطلعه وكتير بسيط لأ، لازم أتمرن عليه، ولازم أتقنه، ولازم قبل ما أنتقل للدرس اللي بعده وأفتحه وأحضره.

لازم أتأكد من إنه صوت الدُم عم بطلع معي مية بالمية، يعني لازم يطلع معي كل مرة نفس الصوت ،مش مرة ومرة ومرة، لأ، لازم كل مرة يطلع عندي نفس الصوت، لو بدي أخد على الدُم تمرين رح أعد للأربعة بطريقة بطيئة مثلاً واحد تنين ثلاثة أربعة، وكل ما أتقنه أكثر وعم بطلع معي نفس الصوت أسمع اه والله تمام تمام مية بالمية خليني أسرع أكثر يعني واحد تنين ثلاث أربعة، وكذلك إنه صار عندي تمام الصوت وأنا مسرع، خليني أسرع أكثر ...وهكذا، بس ما رح أنتقل من سرعة بطيئة جداً إلي سرعة أسرع منها إلا لما يطلع معي الصوت تماماً زي كل مرة بهيك لازم أتقن هذا الدرس مية بالمية، أطلع صوت الدُم منه مية بالمية وبعديها أنتقل الى الجزء الثاني من هذا الدرس وأتعلم صوت التك"