يتحدث نزار هنا عن صوت جديد على الطبلة و هو صوت الكتم و ينتقل الى كيفية استخدام هذا الصوت في الزخرفة.

نزار الحمود:

"مرحبا، أنا نزار من إعزف دوت كوم. واليوم في حلقتنا أو حصتنا الإحدى عشر رح نبلش نتعرف على صوت جديد بنستخدمه بالزخرفة.

هذا الصوت إسمه بُب أو كتم بالانجليزي إسمه بُب بالعربي إسمه كتم، كيف هذا الصوت شكله؟ وكيف بعزفه؟ أول إشي خلينا نشوف شو هو؟ هيك بنعزف (يعزف الأستاذ نزار التمرين).

استعملت في هذا الصوت إيدي اليمين وإيدي الشمال، لو نيجي نفهم هذا الصوت أكثر رح نلاقي عنا جلدة الطبلة، جلدة الطبلة اللي هي إيش مساحة، مساحة واسعة (يعزف الأستاذ نزار التمرين) بطلع معي هذا الصوت، طيب لو إجيب صغرت المساحة، يعني مثلاً عندي كل هالمساحة الدائرية، عملت بدل ما أعمل (يعزف الأستاذ نزار التمرين) 

حطيت مثلاً أفرض حطيت إيدي كاملة هيك، صارت بس عندي هاي المساحة اللي ممكن إنها ترتد وتطلع لي صوت طيب لو صغرتها أكتر، (يعزف الأستاذ نزار التمرين) رح يصير عندي الصوت أحد، لو إجيت حطيت أصبعي مثلاً هون أو بالنص أو على طرف الطبلة، رح يصير عندي مساحة الصوت أو مساحة الجلدة رح تصغر فبذلك الصوت رح يتغير بهذا الدرس بدنا نتعرف على كيف بس خلينا لو بدنا نسميه بلغتنا البسيطة رح نسميه صوت الكتم البسيط بس، بدناش نتعمق فيه كثير حالياً، خلينا نشوف كيف بنعزف، طيب أنا زي ما لاحظتوا حطيت إيدي وعملت هيك (يعزف الأستاذ نزار التمرين).

هلأ ممكن احط أصبعي ممكن أصبعي هاد ممكن أشكال مختلفة للكتم، بس أبسط نوع بس أبسط نوع إني احط أصبعي إيدي بهذا الشكل وأعزف، طبعاً مثلاً بدرس المقئسوم اللي أخذناه الحصة الماضية إحنا كنّا نعمله مثلاً (يعزف الأستاذ نزار التمرين) صح إحنا حكينا ضرباته الأساسية دُم تك إس تك دُم إس تك إس بدل التك غيرناها بسك طيب لو إجيت غيرتها بكتم شو بصير (يعزف الأستاذ نزار التمرين).

بيعطي شكل ثاني بتحس الإيقاع ولا إله علاقة بالإيقاع اللي قبله، يعني لو بدنا نلعبهم أو نعزفهم مرتين ورا بعض نشوف كيف بطلع الصوت بتغير، بنحس الصوت (يعزف الأستاذ نزار التمرين) بنلاحظ إنه بكل لفة في عندي إحساس أو شعور مختلف للإيقاع، مرة الإيقاع عم بكون صاخب لما عم بستعمل السك، ومرة الإيقاع عم بكون حنون، طيب كيف بدي أعزفه هاي الحركة أو الكتم؟ بدي أحط إيدي وبنفس الوقت ألعب التك الشمال (يعزف الأستاذ نزار التمرين) هلأ لما حدا بشوفك من بعيد عم تعزف بفكرك عم بتحط إيدك وعم بتشد إيدك على الطبلة ولهذا الحكي مش صحيح بالمرة، الصوت هاد بس بدي أمسك إيدي وبكل برود يعني يا دوب يعني هه بس حطيت إيدي على الطبلة تغير الصوت، لو برفعها شوي، إيدي مش لامسة الطبلة هلأ، لو بحطها شوي(يعزف الأستاذ نزار التمرين).

طبعاً أولها لما ببلش بدي أعمل الحركة هاي يمكن أصير أعمل حركات كاراتيه، يعني (يعزف الأستاذ نزار التمرين) ما بدنا نعامل الطبلة إنها إشي أفوت عليها هيك وهيك ما بدي أعنفها، يعني بنفس الوقت اللي بحط فيها إيدي على الطبلة إيدي الشمال بتنزل يعني هيك، لو بدي أخذها بالزبط نفس نفس التوقيت، هاي الإيد عم بتيجي على الطبلة وهاي عم تنزل، هيك ما بدي أعمل حركات الكاراتيه اللي حكينا عنها يعني مش (يعزف الأستاذ نزار التمرين) أبداً الموضوع كتير أسهل من هيك (يعزف الأستاذ نزار التمرين).

شايفين بنفس الوقت لو بدي اعملهم بدي أنا بدي أمثللكم إياه بالعرض البطيء، هيك مع بعض نزلت الطبلة وضربتها، يعنى نفس الوقت اللي إيدي عم تلمس الطبلة عم التك عم بضرب حفة الطبلة زي ما تعلمناها من زمان، هلأ هاد شو بفرجينا؟ بفرجينا إنه زي ما كنا عم نحكي إنه أنا إذ إجيت يا عمي على هذا الدرس وأنا مش متعلم الحصة اللي قبل ما رح أقدر أتقدم، يعني إذا إجيت أصلاً مش عارف اعمل التك بالإيد الشمال، كيف بالله بدي أحط إيدي اليمين على الجلدة و بنفس الوقت العب البُب هاد أو الكتم، ما رح يزبط معي، إذا أنا اصلاً عم بنعجق إيدي الشمال مش زي ما بنحكي دايماً واثقة من نفسها، إيدي اليمين كمان ما رح تكون واثقة من نفسها، وكل جسمي ما رح يكون واثق من نفسه، ورح أصير اخبص وهيك وبصير مثلاً بدي أعمل أهم إشي أهم إشي حركة الكاراتية هاي ما بدنا نعملها اللي هي هيك، يعني أنا ما بدي صوت يطلع من إيدي اليمين (يعزف الأستاذ نزار التمرين).

طيب لو نيجي بدنا ناخد تمرين على هذا الموضوع، شو بدنا نعمل؟ ممكن ناخد كتير تمارين عليه وكتير تمارين مسلية، خلينا ناخد أول إشي تمرين هيك بسيط وسهل وبعديها بننتقل لواحد أحلى، الأول بدنا نعمل كتم مش كتم كتم مش كتم يعني كتم تك كتم تك (يعزف الأستاذ نزار التمرين) ون تو ثري فور طبعاً مع المترونوم رح نعزف هذا التمرين بسرعة ستين ضربة في الدقيقة، يعني إذا إنت ما عندك مترنوم بتقدر تطلع على الساعة اللي قبالك وتشوف عقرب الثواني وتمشي معه، واحد تنين ثلاثة أربعة، (يعزف الأستاذ نزار التمرين).

أوكي، هذا إحنا زي ما حكينا إنه ستين ضربة في الدقيقة وبطيء، التمارين الإضافية اللي رح تكون عندكم واللي رح تشوفوها، إنه لازم نلعبه مثلاً أسرع، على راحتكم، يعني ستين ضربة بالدقيقة تمام خلص مية بالمية، بدي أنقل على اللي بعدها،مثلاً ممكن أصير اعمل (يعزف الأستاذ نزار التمرين) يعني لحد هاي السرعة وممكن كمان تمرين إضافي أنا عملت لكم إياه من قبل بداية هذا الدرس، يعني بدي اعزف إيقاع المقسوم أو المئسوم زي ما بدك سميه بطريقة الكتم، لاحظ إني كمان شو عم بعمل؟ عم بعمل عم بقسم التك الأخيرة مش إحنا قلنا دُم تك إس .... (يقرأ الأستاذ نزار التمرين قراءة إيقاعية).

هاي الإس عم بعملها تاتا، طبعاً آخر إشي بعمل هيك، طبعاً ممكن اعمل هيك، ممكن اعمل هيك، رح نشوف كل هاي الأشياء في درس عن تاني عن الكتم بس مش هلأ. فهلأ هيك صار عنا كتير أصوات إحنا بنقدر نطلعها من الطبلة، دُم، تك يمين، سك يمين، تك شمال، وصوت الكتم، بهذول الاصوات تخيلوا قديش بقدر اشكل وألون وأخلي الإيقاع من إيقاع ممل (يعزف الأستاذ نزار التمرين)، لإيقاع مسلي (يعزف الأستاذ نزار التمرين).

في أشياء اخدناها عملتها، وفي أشياء رح ناخدها رح نتعلمها وبنصحكم إنه تتدربوا عليها كثير كثير كثير كثير كثير كثير هلقد كثير يعني و بشوفكم بالحصة الجاي ويعطيم العافية. باي باي."