يتابع طارق الجندي شرح الخانة الثانية و الثالثة من سماعي نوا أثر لجميل عويس و يناقش التحويلات الموجودة في السماعي و يشرح مرة أخرى مقام النكريز , و يعطي أيضا طارق تمرين على الإزاحة.
طارق الجندي:
"مرحبا انا طارق الجندي من اعزف دوت كوم ، اليوم بدرسنا رقم تسعطعش رح نتعرف عالخانة التانية والخانة التالتة من سماعي جميل عويس ، نتطلع على الخانة التانية ، صار في عندي فيها علامة تحويل الي هي اللا ناتشورال ، اول ايشي السي بي مول ، بعدين اللا ناتشورال بدي اعزف اول جمله وبدي اذكركم بمقام انا حكيت عنو قبل هيك ( يعزف الاستاذ طارق التمرين).
هادا المقام مرق معنا ، الي هو مقام النكريز الي كان بلونجه النهاوند ( يعزف الاستاذ طارق التمرين ) وهون بنشوف كيف انو المؤلف عمل عملية تحويل بالخانة التانية من مقام نوا اثر ، راح لمقام النكريز ، نقرأ الخانة التانية ( يقرأ الاستاذ طارق التمرين قراءة ايقاعية ) اول مازورتين ( يعزف الاستاذ طارق التمرين ).
هادا اول موضوع ، الي بعده ( بقرأ الاستاذ طارق التمرين قراءة ايقاعية ) الموضوع الثاني ، ثري فور ( يعزف الاستاذ طارق التمرين ) صارت الخانة التانية عندي ، ثري فور ( يعزف الاستاذ طارق التمرين ) لازم ارجع للتسليم ( يعزف الاستاذ طارق التمرين ).
نروح للخانة التالتة ، الخانة التالتة عادة بتكون بالسماعي هي الذروة ، يعني بوصل المؤلف لأعلى منطقة بالسماعي وفي هاي الخانة التالتة رح ناخد تمرين ، التمرين الي رح ناخده قبل ما ناخد الخانة التالتة هو تمرين الشيفتينج او الازاحه احنا بنعرف الهاف بوزيشن ، (يعزف الاستاذ طارق التمرين ).
بنعرف الدو ، الري ، مي ، بيمول ، وبنعرف الفا ، طب السؤال اذا احنا بدنا نعمل نغمة الصول ، الصول هي بتيجي هون ، باول الزند فاخر الزند ، نقطة التقاء الزند مع بطن العود ، ( يعزف الاستاذ طارق التمرين ) هاي اسمها صول ، وبدي احكيلكم شغلة هاي النغمة الي بتكون تحت ( يعزف الاستاذ طارق التمرين ).
بتكون هي نفسها نغمة الوتر الي قبلها ( يعزف الاستاذ طارق التمرين ) بس بتكون قرار وجواب ، فممكن نتأكد منها اذا كانت صح او لاء عن طريق هادا الايشي ( يعزف الاستاذ طارق التمرين ) هاي بدها تيجي هون النغمة هي زي الوتر الي قبها يعني ههي الري ( يعزف الاستاذ طارق التمرين ) بعدين هون بدها تيجي ال لا حسب الوتر الي قبلها ( يعزف الاستاذ طارق التمرين ) القاعدة بتمشي بس لهون لأنه هون بيصير الدوزان مختلف ، فنيجي نتطلع ، هون بهاي الحالة احنا بحاجة انو نعمل عملية شيفتينج او عملية ازاحه هلأ اول ايشي ، بدو يصفي الموضوع كالتالي في عندي انا هون دو ( يعزف الاستاذ طارق التمرين ) ري اتطلعو على ابهامي كيف ، ميبي مول ، الفا بدها تيجي بالاصبع الاول ، هاي الي بتيجي عندك بالاصبع الرابع بدك تزحف الاول للاول ، صول ( يعزف الاستاذ طارق التمرين ) بدها تيجي بالاصبع التالت ، وبدي احكيلكم شغلة عن الابهام كيف بينزل ، الابهام بهاي الحالة لما بيكون هو هون بيكون بهاي الشكل ، لما بدو ييجي ينزل ، كل ما ينزل اكتر بينزل بشكل قطري ، يعني الابهام ما بينزل هيك ، الابهام بينزل بهادا الشكل ، القطري ، فدايما ابهامي ، لازم اكون شايفو كيف عم بينزل بموضوع الشيفتينج ، اطلعو كيف من هون من هاي الزاوية ( يعزف الاستاذ طارق التمرين ) نزل بهالشكل ( يعزف الاستاذ طارق التمرين )معلومة كمان مهمة ، انا في عندي هاي ميبي مول ( يعزف الاستاذ طارق التمرين ) دايما اصبعي الاول لازم يكون ثابت لما بدي اروح عالفا لانه هو الي عم بيعمل الفا من الري ( يعزف الاستاذ طارق التمرين ) هيك مستحيل في احتمالية نشاز عالية هيك ( يعزف الاستاذ طارق التمرين ) بدي اروح للصول ( يعزف الاستاذ طارق التمرين ) للفا عفوا ( يعزف الاستاذ طارق التمرين ) والابهام عم بينزل."
