الدروس
03:00:08 ساعة
34 الدروس
الغناء
المقامات الفرعية لمقام العجم
ادخل بريدك الإلكتروني لتبدأ مجاناً الآن
بالضغط على الزر اعلاه اوافق على شروط واحكام موقع إعزف
نص الحوار

مثال على المقامات الفرعية لمقام العجم , كورد "مي" , تعلم مقام "الشوق أفزا" , مثال من أغنية (إعتزلت الغرام) السيدة ماجدة الرومي , تعلم مقام الجهاركاه أو المزموم , ما هي علامة الجهاركاه , تغير أسماء المقامات بين البلدان , مقام الماهور , مثال من أغنية (ان كنت اسامح) السيدة أم كلثوم.


ريبال خضري:


"اليوم نحنا بدنا نحكي عن المقامات الفرعيه لمقام العجم، المره الماضيه حكينا شو فكرة المقامات الفرعيه، من وين إجت إن نحنا نقول إن هادا المقام فرعي عن المقام الفولاني.


هلأ نحنا اليوم حناخد مثال على هادا الكلام مقام العجم، بالنسبه لمقام العجم نحنا بنعرف إن هو عباره عن جنسين، هو (يقرأ الأستاذ ريبال التمرين قراءة ايقاعية)، جنس عجم عالدو، بعدين (يقرأ الأستاذ ريبال التمرين قراءة ايقاعية)، جنس عجم عالصول، أنا عندي جنسين عجم عالدو و عالصول، هلأ إذا أنا بدي آخد مقام جديد، طبعاً أنا ما كتير دائماً بفضل فوت بالأسماء بس أنا راح أطرح أمثله، أنا إذا بدي آخد مقام جدي فيني أنا أعمل مقام إذا أنا غيرت الرسو تبعي صرت أنا عم برسي على المي، صرت عم باخد كرد المي.


صرت عم بقول مثلاً إذا أنا بدي أعمل ارتجالات حقول (يقرأ الأستاذ ريبال التمرين قراءة ايقاعية)، هلأ أنا شو حاجي أعمل؟ حقول (يقرأ الأستاذ ريبال التمرين قراءة ايقاعية)، المثال اللي أنا طرحته هو مجرد تغيير، يعني أنا ممكن إني أغير بالمقام و بالتالي أكيد راح يكون عندي مقام فرعي بغض النظر إني أنا أفتش عن إسمه.


هلأ من المقامات اللي إلها أسماء، عنا مقام كتير معروف اللي هو مقام الشوق أفزا، هيك إسمه، إسمه غريب شوي مقام الشوق أفزا، شو هو مقام الشوق أفزا؟.


هو عباره عن جنسين مختلفين و متباعدين كلياً اللي هو مقام أول شي عجم (يقرأ الأستاذ ريبال التمرين قراءة ايقاعية)، بعدين بيجي عندي مقام الحجاز (يقرأ الأستاذ ريبال التمرين قراءة ايقاعية)، بعدين حجاز (يقرأ الأستاذ ريبال التمرين قراءة ايقاعية)، يعني نحنا لو سمعانين إعتزلت الغرام للسيده ماجده الرومي لما بتقول ما بدي تراضيني و لا بدي تحاكيني، نحنا هن صرنا بنعمل مقام الحجاز فوق بعدين بنرجع للعجم (يقرأ الأستاذ ريبال التمرين قراءة ايقاعية)، نرجع للعجم (يقرأ الأستاذ ريبال التمرين قراءة ايقاعية).


هاي مثال عنا على مقام الشوق أفزا، في عنا مثال من المقامات ياللي قلنا إن هي مجرد تغيير بالدرجه و غالباً ممكن يكون إلها أسلوب غنائي يعني حسب مين أكتر حدا انشهر فيها اللي هو مثلاً مقام الجهاركاه، مقام الجهاركاه هو عباره عن نفس مقام العجم و لكن يبتدئ بعلامة الفا (يعزف الأستاذ ريبال التمرين).


يعني نحنا العجم العادي بيبلش بالدو أما هون فنحنا حناخد عجم الفا، حيكون عنا (يقرأ الأستاذ ريبال التمرين قراءة ايقاعية)، فا صول لا سي دو راي (يقرأ الأستاذ ريبال التمرين قراءة ايقاعية)، عملياً نفس المقام و لكن إسم آخر باعتبار إن هو غير، بعاً للعم علامة الجهاركاه هي الإسم العربي لعلامة الفا، كمان من مثلاً مقام الجهاركاه على سبيل المثال أنا قلتلكم في مقامات بتتغير بتغير البلدان، بتغير إسمها، مثلاً الجهاركاه هو تقريباً نفس مقام المزموم بتونس، هو تقريباً عجم من الفا ما فيه تعديلات، أسلوب الغناء متشابه كلياً، مشان هيك تقريباً بنلاقي جهاركاه و المزموم التنين نفس الإشي، في مقام فرعي كمان ممكن إن نحكي عنه اللي هو مقام الماهور، مقام الماهور هو مقام ممكن نقول تقريباً هو شبه ما عدنا سمعنا فيه، هو أساساً من المقامات الصعبه غنائياً لإن بيجمع جنسين صعبين نحنا أخدناهن، اللي هو جنس العجم و جنس الرست، بيعطيني جنس عجم من الدو (يقرأ الأستاذ ريبال التمرين قراءة ايقاعية).


بيجي عندي (يقرأ الأستاذ ريبال التمرين قراءة ايقاعية)، مقام فيه جنس شرقي كلاسيك أو إشي غربي اللي هو الميجر بعدين بيروح على جنس الرست فبكون صعب، متل هادا المقام بنلاقيه على أغنية إم كلثوم، أغنيه كتير قديمه بترجع لحوالي تسعين سنه اللي هي أغنية إن كنتَ سامح و انسى الأسير (يقرأ الأستاذ ريبال التمرين قراءة ايقاعية)، هون عملنا رست بعدين (يقرأ الأستاذ ريبال التمرين قراءة ايقاعية).


أوكي، هادا مثال على مقام الماهور، طبعاً الأمثله لا تعد و لا تحصى، بالعموم أكتر المقامات أكتر استعمال هو عموماً الشوق أفزا، بس برغم هيك ما عاد كتير ناس فكرت بفكرة الفرعي، فكرو دائماً بإن نحنا بإمكاننا نضيف جنس عهادا الجنس عهادا الجنس يطلع عنا مقام مختلف، منا مضطرين نرتبط بأربعميه و تسعين مقام و نحنا نحفظهم بصم، لاسيما مع الإختلافات الموجوده فيهم.


بشوفكم الدرس الجاي نحكي عن النهاوند.


باي."

عن المدرب
ريبال خضري
ريبال خضري
فنان سوري .. - له العديد من الأغاني الخاصة مثل " بلدي عم يوجعني – يا بيتي شو اشتقتلك - شوية حكي – الله معك – حبيبي انا " - له ثلاثة ألبومات وهي 1- " قصائد سياسية " من انتاج الصندوق العربي للثقافة والفنون التابع لجامعة الدول العربية وهو عمل من كلمات الشاعر الكبير احمد مطر والحان وتوزيع باسل رجوب .. 2- " توشيحات " : الخاص بفرقته فرقة " التوشيح الحديث " التي طرح فيها ريبال موشحات بأسلوبه الخاص و سيقوم بتقديم البومات دورية لها . 3- " شوية حكي " قدمه ريبال مع عام 2010 من انتاج شركة المورد الثقافي - ريبال خريج المعهد العالي للموسيقا في سوريا – دمشق قسم الغناء الشرقي يلعب ألتي البيانو والعود ... - حاصل على ماستر كلاس من جامعة الكسليك عام 2010 - حاصل على 1- وعلى الجائزة الأولى كأفضل صوت عربي ضمن ملتقى الاصوات الجميلة الذي تم تنظيمه من قبل المجمع العربي للموسيقى في كلية الكسليك – لبنان ونال على اثرها ماستر كلاس من الجامعة . 2- الجائزة الثانية كأفضل صوت عربي ارتجالي في مهرجان الموسيقى العربية في القاهرة السابع عشر 2008 - ريبال حاليا مدرس الغناء في المعهد الوطني للموسيقا في عمان ومدرس مادة الغناء العربي في الكونسرفاتوار الأردني ومدرب جوقة عمون للغناء الكورالي الحديث . - قدم حفلات كمغني منفرد ذائع الصيت مع فرقته الخاصة ومع اهم الفرق والاوركسترات العربية والعالمية من مثل " الأوركسترا السمفونية السورية – أوركسترا عمان الفلهوارموني – أوركسترا عمان سمفونيتا – كورال أوزنابروغ الألماني – فرقة طرب .. " وذلك في اثر من عشرين مدينة عربية وعالمية في " المانيا – ايطاليا – فرنسا – الصين – أذربيجان – تركيا – الامارات – مصر – السودان – تونس وغيرها ... "

شارك اعزف. ساعد غيرك يبدأ الرحلة!

أهدِ تجربة اعزف لشخص مميز!