الدروس
01:51:94 ساعة
20 الدروس
الغناء
تعلم غناء مقام الحجاز
ادخل بريدك الإلكتروني لتبدأ مجاناً الآن
بالضغط على الزر اعلاه اوافق على شروط واحكام موقع إعزف
نص الحوار

يشرح الأستاذ ريبال مقام الحجاز تاريخياً و من ثم يبدأ بشرح المقام بالتفصيل.


ريبال خضري:


"مرحبا، أنا ريبال من إعزف دوت كوم.


هلأ لو بدنا نحكي عالمقامات، نحنا أخدنا بأول الكورس حكينا عن مقام الكرد هلأ راح ننتقل لمقام الحجاز، مقام الحجاز من أكثر المقامات العربيه انتشاراً ضمن الغناء القديم، حتى ضمن الغناء الجديد ممكن نلاقي كتير من الناس اللي بيغنوا مقام الحجاز، طبعاً أكيد تسمية مقام الحجاز هي عائده لمنطقة الحجاز منطقة مكه المكرمه و المدينه المنوره و ما حوله، نحنا بنحكي على مقام إله صبغه دينيه، إله طابع إسلامي، أكثر الأذانات أو أشهر الأذانات اللي نحنا بنسمعها، هاي الأذانات أكترها بتكون من مقام الحجاز، يعني أقول (يقرأ الأستاذ ريبال التمرين قراءة ايقاعية). 


نحنا بنحكي على مقام بنحس فيه حزن بنفس الوقت بنحس فيه طاقه غريبه، بنحس فيه بنفس الوقت جو إسلامي بحت جو روحاني بحت و نحنا عم بنسمع هادا المقام، مقام الحجاز راح أعطيكم راح أقلكم معلومه ممكن تستغربوا منها، مقام الحجاز مش كتير بيفرق عن مقام الكرد، يعني لو إجينا نعزف مقام الحجاز، حناخده كمان من درجة الراي أو درجة الدوكا (يعزف الأستاذ ريبال التمرين).


حيفرق عندي نوته وحده بكل السلم هي نوتة الإف شارب أو الفا دييز، أنا بكل السلم كان عندي المي بي مول و السي بي مول أو الإي فلات و البي فلات، أنا هون راح ينضاف عندي نوته زياده غير هدول التنين اللي هي الإف شارب، كيف (يقرأ الأستاذ ريبال التمرين قراءة ايقاعية)، هلأ في شغله بدكم تنتبهولها بلصولفيج، أنا لما بكون كاتب متل هيك، عادةً طبعاً بالموسيقى الغربي ممنوع إني أنا إجمع بالكي سيغنتشر أو على جنب إني أنا حاط الإف شارب اللي شايفينها مع السي بي مول مع المي بي مول، كتير ممنوع إني أنا أحطهن سوا على جنب، لإنو ما بيصير إجمع شارب مع بي مولز بنفس الكي سيغنتشر، يا إما بدو يكون عندي شاربس يا بده يكون بي مول، هلأ أنا في عندي طريقتين لحتى إكتب الشاربس و الفلاتس الموجودين عندي، إما إني أنا بالكي سيغنتشر إترك المي فلات و الإي المي فلات و السي فلات أخليهم موجودين بأول الكي سيغنتشر، و الفا شارب وين ما بتمرق بحطها بمكانها، أو في عندي حل تاني اللي هو الحل اللي بيستعملوه التراك أو اللي بيستعملوه بعض الشعوب الشرقيه لإن هنن خلص بيوفروا عليهم و بيحطوا عاليسار قائمة كي سيغنتشرز و ممكن يكون فيها فلات ممكن يكون فيها شاربس، مش كتير مهم، هلأ العرب عادةً أو الموسيقى العربيه عادةً بتتجه إن هي تستعمل المي فلات و السي فلات تحطهن على جنب و تخلي الفا شارب موجوده ضمن السلم، هلأ أنا لو بدي إيجي إحكي عن الفارق بين مقام الحجاز و مقام الكرد بالعزف، راح ألاقي إن أنا كل الفرق هو فقط بعلامه وحده اللي هي الفا، أنا سويت الفا هي شارب، كانت بالكرد كانت فا عاديه، لو شفناهم قدام بعض مقام الكرد حيكون (يقرأ الأستاذ ريبال التمرين قراءة ايقاعية)، أما الحجاز راح يكون (يقرأ الأستاذ ريبال التمرين قراءة ايقاعية).


حيفرق عندي نوته صغيره حتغير كل شي، بالنسبه للأبعاد أنا تغير عندي طريقة الحساب، أنا إذا متذكرين كنا عم بنحكي بالعجم، أنا عم بحكي هلأ بس عجنس الحجاز اللي هو الراي مي بي مول فا شارب و صول، أنا من قبل كان عندي بالعجم عندي بعد بعدين بعد بعدين نص، بالنهاوند عندي بعد بعدين نص بعدين بعد، عم بححكي عن المقامات اللي ما فيها أرباع، عم بحكي المقامات اللي بتستخدم اللي ممكن تنعزف على البيانو، بالكرد أنا كان عندي النص بعدين بعد بعد، هلأ بالحجاز راح ألاقي عندي نص بعد و نص نص، يعني خليت النصاص عالطرفين، عندي راي بي مول عندي فا دييز صول، هاي نص بنص، و عندي من المي بي مول مي بي مول للفا دييز أنا عندي بعد و نص كاملين، هاي بالنسبه للفرق بين مقام الحجاز و مقام الكرد.


طبعاً الفرق يمكن نحنا بالغنى يمكن ما نقدر نميزه بس على النوت هو فرق جدّاً بسيط، بالدرس القادم نحنا راح نتناول مقام الحجاز أكتر، راح ناخد تمارين معقده عليه أكتر، فيما بعد راح نحكي على مشتقات مقام الحجاز شكراً بس شكراً."

عن المدرب
ريبال خضري
ريبال خضري
فنان سوري .. - له العديد من الأغاني الخاصة مثل " بلدي عم يوجعني – يا بيتي شو اشتقتلك - شوية حكي – الله معك – حبيبي انا " - له ثلاثة ألبومات وهي 1- " قصائد سياسية " من انتاج الصندوق العربي للثقافة والفنون التابع لجامعة الدول العربية وهو عمل من كلمات الشاعر الكبير احمد مطر والحان وتوزيع باسل رجوب .. 2- " توشيحات " : الخاص بفرقته فرقة " التوشيح الحديث " التي طرح فيها ريبال موشحات بأسلوبه الخاص و سيقوم بتقديم البومات دورية لها . 3- " شوية حكي " قدمه ريبال مع عام 2010 من انتاج شركة المورد الثقافي - ريبال خريج المعهد العالي للموسيقا في سوريا – دمشق قسم الغناء الشرقي يلعب ألتي البيانو والعود ... - حاصل على ماستر كلاس من جامعة الكسليك عام 2010 - حاصل على 1- وعلى الجائزة الأولى كأفضل صوت عربي ضمن ملتقى الاصوات الجميلة الذي تم تنظيمه من قبل المجمع العربي للموسيقى في كلية الكسليك – لبنان ونال على اثرها ماستر كلاس من الجامعة . 2- الجائزة الثانية كأفضل صوت عربي ارتجالي في مهرجان الموسيقى العربية في القاهرة السابع عشر 2008 - ريبال حاليا مدرس الغناء في المعهد الوطني للموسيقا في عمان ومدرس مادة الغناء العربي في الكونسرفاتوار الأردني ومدرب جوقة عمون للغناء الكورالي الحديث . - قدم حفلات كمغني منفرد ذائع الصيت مع فرقته الخاصة ومع اهم الفرق والاوركسترات العربية والعالمية من مثل " الأوركسترا السمفونية السورية – أوركسترا عمان الفلهوارموني – أوركسترا عمان سمفونيتا – كورال أوزنابروغ الألماني – فرقة طرب .. " وذلك في اثر من عشرين مدينة عربية وعالمية في " المانيا – ايطاليا – فرنسا – الصين – أذربيجان – تركيا – الامارات – مصر – السودان – تونس وغيرها ... "

شارك اعزف. ساعد غيرك يبدأ الرحلة!

أهدِ تجربة اعزف لشخص مميز!