في هذا الدرس يتحدث ريبال عن المقامات بشكل عام تمهيدا لأجزاء أخرى من دورة تعلم الغناء العربي و يعطي تمريناً على مقام العجم و نهاوند.
ريبال خضري:
"هلا نجرب أنه نحنا ناخد تجربة بسيطة كتير نحاول نغني على كل مقام فقط السلم الموسيقي.
حنبلش بمقام العجم (يعزف الاستاذ ريبال التمرين) حنقوله بشكل العلامات دو ري مي فا صول لا سي دو و حنقول كل علامة بزمن مستديرة اللي هوه أربعة أزمنة (يعزف الاستاذ ريبال التمرين).
طبعا أنا انتبهت أنه يكون حتة وانا عم بعمل هلعلامات حتى على الأقل تمي مفتوح ما بضرورة أني اضغط بالصوت ولكن خلي حاول يكون تمي مفتوح هلأ حناخد النهاوند بنفس المكان (يعزف الاستاذ ريبال التمرين) طبعا أنا بدي انتبه أنه أنا عم غني علامات صولفيج البيمول والدييز مش علامات بلفظها يعني ما بصير قول لا بيمول لأ لانه بدها تمرق معي بسرعة فانا بس الدييز بحاول أني بالاوعي ارفع صوت الشوي أو بالبيمول اني نزل الصوت شوي نروح نجرب مقام الرست (يعزف الاستاذ ريبال التمرين).
طبعا انتبهت و أنا عم غني مقام الرست أنه في علامات شريقية صعب أنه هيه تنقال على البيانو أو بالأحرى هيه على بيانو الأكوستنغ غير موجودة بحكم انه البيانو اساس اذا طلعتوا العلامات البيض هنن بمثلوا دو ري مي فا صول لا سي دو فبكون بيناتن كلياتن بعد بعد بعد ما عدا مي فا و سي دو متل ما حكينا ولكن بكون العلامات السود هيه يلي بتمثلي الأنصاف بيناتن بس ما عندي علامة بتمثلي الربع يعني دو نص دييز اللي هوه بين الدو والدو دييز ما عندي هيك اشي موجود غير بالعود أنا بقدر اتحكم فيه أو بالالات الشرقية عموما أنا بقدر اتحكم فيه بشكل حقيقي أو ببعض الالات الوترية السترنغز الكمان الفيولا الفيونسيه ممكن أنا أني اقدر اتحكم بهاي العلامات نجرب مقامات تانية حنجرب مقام البياتي (يعزف الاستاذ ريبال التمرين).
ممكن بس نحكي اشي مشان نتزكر المقامات العربية دائما المقامات العربية مجموعين بكلمتي صنع بسحرك مشان اذا حبينا نتزكرن ما ننساهن صنع بسحرك هيه مأخود من أول كل حرف من كل مقام الصاد يعود للصبا النون للنهوند العين للعجم الباء للبياتي السين للسيكاه الحاء للحجاز الراء للرست والكاف الكرد طبعا من كل مقام من هدول المقامات حيكون عنا مقامات مشتقة وفرعية حنحكي عن مقامات مشتقة والفرعية كيف ممكن نوظفها في دروس لاحقة.
باخر هاد الدرس بحب قولكن أنه المقامات العربية دائما تستخدم باكتر الأغاني العربية القديمة ولكن للأسف نحنا بهاد الوقت أكتر الأغاني اللي بنسمعها بتكون مختصرة بمقامين اللي هنن كرد ونهاوند غالبا اكتر مقامين بيستعملوا ممكن لحالات قليلة أنه بنسمع عجم كمان عم يستعمل عدا عن ذلك بالدروس القادمة اكيد رح نخصص لكل مقام من المقامات فسحة من الوقت لحتى نقدر نتدرب عليه أكتر نتدرب على غنائه على تميزه وعلى قرائته كصولفيج."
