يبدأ هذا الدرس بالحديث عن النوتة الموسيقية , يتكلم الأستاذ ريبال عن النوتة الموسيقية تاريخيا و من ثم ينتقل و يشرح السلم الموسيقي و قراءة النوتة و أهمية ذلك للصولفيج.
ريبال خضري:
"طيب نرجع اليوم رح نحكي عن موضوع كتير كتير مهم أكيد هوه مهم لأيلي ولكل حدا يمكن يلي رح يستفاد من هاد الدرس مو بس اللي عم بياخدوا دروس غناء كمان اللي عم بياخدوا أي دروس الها علاقة بالألات.
دائما اللي بدرسوا الالات موسيقية بكون أول فترة كتير عم يتلبكوا لأنه بدهن يعلموا كيف بتنقرأ النوتة الموسيقية. اليوم نحنا رح نحاول نختصر كيف تقرأ النوتة الموسيقية بمبدأ سريعة بأفكار سريعة . متل ما شايفين عندكن نحنا عنا عبارة عن خمس اسطر موجودين هدول الأسطر هنه اللي بنكتب عليهن العلامات الموسيقية هلأ علميا قديما كانوا من قبل لما بدهن يكتبوا مثلا انتقالات بين الدو الري المي الفا كيف بدي اطلع كيف بدي انزل.
كان في اسلوب بشبه اسلوب تخطيط القلب اذا حدا شايفه منكن أنه بيطلع بينزل بيرجع ينزل أكتر أنه مثلا بيطلع الدو المي بيطلع بيرجع على فا بطلع أكتر برجع صول بطلع اكتر بينزل بينزل لتحت وهكذا دواليك كان في كتير اعتماد على هاي النقطة ببداية تقريبا القرن الأربعطاش بلشت بأوروبا تنشر فكرة أنه تعو نحط مثلا ثلاثة خطوط أو اربع خطوط وبلشت بعض الدول تستخدم ثلاثة بعضها أربعة وحطوا مثلا علامات أنه المي على الأول الفا بعدها الصول الفوق الري كل دولة كانت تستعمل المقياس اللي هيه تحسه مريح الها أكتر مع بداية القرن أو نهاية القرن الأربعطاش بداية الخمسطاش فرنسا اعتمدت اسلوب الخمس أسطر وأنه مي بتكون على السطر الأول والصول بتكون على السطر الثاني السي بتكون على السطر الثالث بعدين من فوق لما أنا برجع بكفي سي دو ري جواب بتكون على السطر الرابع والفا جواب بتكون على السطر الخامس.
هلأ بيناتهن رح يكون عندي الفا محطوطة على الفراغ الأول الا على الفراغ التاني و الدو على الفراغ التالت والمي بتكون موجودة على الفراغ الرابع من فوق هلأ بيصفى عندي العلامات الأساسية اللي نحنا ماموجودة هون اللي هيه ري و الدو اللي بيكونوا بداية السلم , كان اقترحوا و مشي هاد الأقتراح انهن يحطوا الري تحت السلم الموسيقي تماما والدو حطو كمان تحت أكتر شوي وحطولها مثل سطر اضافي خاص فيها.
هلأ الصولفيج هو عبارة عن نقطتين كتير اساسيات أول نقطة يلي هيه الدرجات تاني نقطة اللي هيه زمن هلأ الدرجات الموجودة اللي تستعمل بالصولفيج بتتغير دائما بتغير مكانها يعني نحنا عنا شكل ثابت اللي هوه عبارة عن هاي الدائرة الصغيرة سوداء يلي هيه بنسميها نوتة هاي النتوته لو انا غيرت بمكانها على هدول الخمس أسطر تغير المكان رح يتغير عندي الأسم وبالتالي رح يتغير اللحن بالتالي رح تكون على سطر الأضافي اللي هوه تحت رح تكون دو(يعزف الاستاذ ريبال التمرين).
هلأ أنا ما رح اطلب أنه نحنا نشتغل فوق الدو اللي هيه على الفراغ التالت حنحاول أنه نحنا نحفظ مكان الأحرف الموسيقية دو ري مي فا صول لا سي دو على مكان الأسفل من الدو وما تحت هلأ هاي بالنسبة لتغير مكان هلأ كيف بقدر مرن عيني على هاد المكان دائما أهم مغنين المحترفين بالعالم بيعتمدوا على النوتات الموسيقية المحطوطة قدامن, الفرق بين مغنيين كتير عنا أنه هنن بيحفظ اللحن بأدنه مره و تنين و تلاتة و يمكن بياخد الكاسيت و السي دي وبيعيد بعيده بعد خمس أيام بينما المغنين البرا أنا كل اللي بيتطلب مني الموضوع أني أعطيه النوته مكتوب عليها اللحن وتحته كلام ما بياخد منه الموضوع أكتر من خمس دقائق أنه يعرف شو اللحن وكيف يغنيه بشكله السليم فاذا أنا بدي كون مغني محترف لازم اتعلم كيف اقرأ هاي العلامات كيف احفظ مكان هاي النوتات الموسيقية هلأ كيف بقدر اني عود عيني على مكان النوتات حاخد تلات علامات فقط باول يوم يلي هنن مي و الفا و الصول المي على السطر الأول والفا بالفراغ الأول والصول بالسطر التاني حاجي ادرب عليهن كيف هتعاون أنا و احد أصدقائي حيجي يعطيني اشارة على وحدة من هاي العلامات حيقولي هاي شو حقول له مي رح يأشرلي على اللي بعدها فا صول مي فا مي حأشر هون هيكون عندي مي فا صول حيجي هوه على مكان الموجود حيأشرلي مي صول فا مي صول فا صول مي فا مي صول مي فا مي فا كل ما عيني مارست هاي العملية أكتر كل ما تعودت على مكان يوم بعد يوم رح أضيف علامة موسيقية.
رح كون أول شي مي فا صول بعدين رح ضيف الري تحتهن لحتى اتعود عليها اكتر كل المطلوب أني انا مارس هاي العملية أكتر فأكتر بعدين حضيف الدو بعدين حضيف الا بعدين حضيف سي ما حضيف أي علامة الا لما أنا كون متمرن عليها بشكل أكتر هلأ مع هادا الدرس رح نلاقي في معنا مرفق حنرفقه بهادا الدرس يلي هوه عبارة عن بعض تمارين لحتى نحنا نضيف المي حنضيف الفا حنضيف الصول حنضيف لا حيكون عنا عبارة عن تمارين رح تتدرب عليهن وحدة ورا وحدة لحتى تتدرب فقط على مكان العلامات الموسيقية هلأ هاي أول شق من صولفيج."
