تعريف عام عن البيانو , طريقة العزف الصحيحة , تحديد موقع الدو على البيانو.
لونا رفاعي:
"مرحبا أنا معكم لونا الرفاعي من فريق اعزف.
اليوم راح نحكي عن آلة البيانو بداية راح نشرح عن الآلة بشكل عام وبعدين راح ندخل بالتفصيل بكيفية العزف علي البيانو.
بشكل عام آلة البيانو هي آلة وترية نقرية في عنا مجموعة من المفاتيح يللي راح نستخدمها لحتي نوصل للصوت.
هلأ لو بنطلع بشكل عام علي آلة البيانو بنشوف عنا مفاتيح بيض ومفاتيح سود ودايما بيجي سؤال كيف كل مفتاح بيعطي لحن وشو الفرق بين الأبيض والأسود وهادا اللي راح نتعلمة اول شي بالبيانو لما بدنا نعزف اهم شي نعرف انه لازم نكون قاعدين قعدة مريحة ومايكون ايدينا متشنجين او جلستنا غير مريحه لأنه ممكن تأثر على طريقة العزف علي البيانو.
فا بالبداية لازم يكون عندي الكورسي قريب ويعني بحد معين او مسافة معينة مو كتير قريب من البيانو ولا كتير بعيد عن البيانو متل هاي الوضعية بالظبط وبدو يكون الظهر مشدود مرفوع شوي بدنا نكون الأكتاف مرخية والإيدين وضعيتها بهادا الشكل هلأ من الخطأ انه نحنا نحط إيدينا بهادا الشكل مبسوطه تماما على المفاتيح من الأفضل انه لو بدنا نوصل لوضعية مناسبة للأصابع علي المفاتيح تكون بشكل كأنه احنا بنتخيل حالنا حاملين تفاحة او طابة او شكل متل هيك.
يعني بإختصار انا بيهمني كتير رأس الأصبع هو يللي يعف علي البيانو ولو بنحكي عن رأس الأصبع كتير مهم نحكي عن موضوع الأضافر لو ماراح يكونو عنا كتير طوال لأنه ممكن خلال العزف يصير في عندي نسمع صوت الأضافر وهي عم تضرب علي المفاتيح وهادا ممكن يعمل إزعاج وممكن كمان يعمل صعوبة بالأداء هلأ بداية الموضوع في عنا المفاتيح البيض والمفاتيح السود في عنا السلم الموسيقي بشكل عام بيبلش عنا من دو وبيمشي بتسلسل صعودا دو رى مى فا صول لا سى دو.
فا احنا لو بدنا نعرف وين عندي دو منتصف البيانو بيجي بمنطقة الوسط (تعزف الأستاذة لونا التمرين)طريقة العزف كانت لو منتبهين الإيد بهادا الشكل كأني ماسكة طابة مره تانية بدي أعطي ايدي الحريه بالحركة ما بدي أحس انه في تشنج أبدا (تعزف الأستاذة لونا التمرين).
هلأ كتير طلاب بيضيعو بكترة المفاتيح عندي أسود كتير وأبيض كتير فا أنا كيف بدي أوصل للدو المنتصف بكل بساطة احنا في عنا اذا بتلاحظو دايما في مجموعة تلات كبسات سود لحالهم بعدين بيجو كبستين لحال هلأ المفتاحين السود اللي لحال هما بنبلش عندهم الدو بهادا الشكل وين في عندي كل مابشوف مفتاحين سود بروح عند الدو مباشرة هاي بتكون بدايتي ونفس الشي لو بدنا نطلع لمكان آخر علي البيانو (تعزف الأستاذة لونا التمرين)ولو بدنا نشوف شي اسفل بهادا الشكل (تعزف الأستاذة لونا التمرين).
هادا بشكل عام درسنا الأول عن البيانو بنشوفكم بدرسنا الجاي."
