الدروس
03:49:22 ساعة
33 الدروس
العود
علامات التحويل
ادخل بريدك الإلكتروني لتبدأ مجاناً الآن
بالضغط على الزر اعلاه اوافق على شروط واحكام موقع إعزف
نص الحوار

في الجزء الثاني من الدرس الحادي عشر نتعرف على علامات التحويل : البيمول و الدييز و البيكار و نبدأ بتطبيقات على علامات التحويل هذه.


طارق الجندي:

"الجزء التاني من درس احدعش، و إسمه علامات التحويل اللي هم الأكسيدنتلز، خلينا نقرأ و نشرح شوي شوي، يوجد ثلاث أنواع من علامات التحويل، راح أبلش بالأخيره التالته إسمها البيكار أو الناتشورال، و هي وظيفتها إعادة النغمه إلى وضعها الطبيعي، شو هم الأوضاع الطبيعيين اللي إحنا بنعرفهم؟ هم اللي درسناهم، يعني الدو الطبيعيه هون، هاي الطبيعيه (يعزف الأستاذ طارق النوتة)، راي (يعزف الأستاذ طارق النوتة)، هاي العلامه الطبيعيه، مي (يعزف الأستاذ طارق النوتة)، فا (يعزف الأستاذ طارق النوتة)، صول (يعزف الأستاذ طارق النوتة)، لا (يعزف الأستاذ طارق النوتة)، سي (يعزف الأستاذ طارق النوتة)، دو (يعزف الأستاذ طارق النوتة)، هاي كلها علامات طبيعيه، و إذا بتشوفوا هي نفسها العلامات البيضا اللي موجوده بالبيانو، العلامات البيضا كلها من أول البيانو لآخره هاي هي العلامات الطبيعيه نفس اللي إحنا عزفناها هون، نروح لعلامه رقم واحد اللي هي البيمول أو الفلات و شكلها زي حرف البي، وظيفتها خفض النغمه نصف درجه، شو يعني؟ هلأ نرجع لأول إشي بوضعية اليد اليسرى، حكينا لما نحط الإبهام بهالشكل، و إجينا الإصبع الأول بيكون في أول الزند، بعدين الإصبع التاني بعدين الإصبع التالت بعدين الإصبع الرابع بهالشكل، لو بدي آجي على وتر الصول (يعزف الأستاذ طارق النوتة)، هاي صول، لا (يعزف الأستاذ طارق النوتة)، القاعده بتحكي بين كل إصبع و إصبع على آلة العود يوجد نصف درجه، يعني بين هادا الإصبع و هادا الإصبع نصف درجه، بين هادا الإصبع و هادا الإصبع نصف درجه، بين هادا الإصبع و هادا الإصبع نصف درجه، يعني عندي هاي لا، إذا بدي أنزلها نصف درجه بدها تكون هاي النغمه، هاي اللا، إذا بدي أرفعها نصف درجه بتكون هاي النغمه، فهاي النغمه اللي بالإصبع التالت لا زايده نص، و هاي بتكون اللا ناقصه نص، و هاي اللا الطبيعيه بينهم، فعندي نغمتين للا ، اللا الطبيعيه، اللا الناقصه نص و لا الزايده نص، نيجي نتطلع البي مول وظيفتها خفض النغمه نصف درجه، فإذا هاي لا، هاي إسمها لا (يعزف الأستاذ طارق النوتة) بي مول، هاي لا (يعزف الأستاذ طارق النوتة)، هاي (يعزف الأستاذ طارق النوتة) لا مرفوعه نصف درجه، نيجي نتطلع على العلامه التانيه اللي إسمها الدييز أو الشارم و شكلها زي المربع أو الهاشتاق، هاي وظيفتها رفع النغمه نصف درجه، فهاي صار إسمها إذا هاي لا ناتشورل (يعزف الأستاذ طارق النوتة)، هاي إسمها (يعزف الأستاذ طارق النوتة) لا دييز، نيجي نتطلع هاي النغمه إسمها سي بنعرفها (يعزف الأستاذ طارق النوتة)، إذا نقصناها نصف درجه صارت هاي (يعزف الأستاذ طارق النوتة) صار إسمها سي بي مول، سي ناقصه نص درجه، طيب، بدي ألفت نظركم لشغله، هاي صول (يعزف الأستاذ طارق النوتة)، هاي لا (يعزف الأستاذ طارق النوتة)، هاي سي (يعزف الأستاذ طارق النوتة)، هاي النغمه اللي هي بالإصبع التالت إذا بدي أحكي إسمها بالنسبه لهادا الإصبع اللي هو اللا فهي لا دييز، و إذا بدي أحكي إسمها بالنسبه للسي فهي سي بي مول، معناها هاي النغمه إلها طريقتين لتسميتها، يا بسميها بالنسبه للي قبلها أو بسميها بالنسبه للي بعدها، فبنستنتج إن اللا دييز هي نفسها السي بي مول، في كل نغمه بيكون إلها أكتر من إسم لتسميتها بس هم نفس الصوت، نيجي نتطلع، هاي مي (يعزف الأستاذ طارق النوتة)، بتكون هاي المي بي مول (يعزف الأستاذ طارق النوتة)، هاي مي (يعزف الأستاذ طارق النوتة)، بس بدي أزيدها نص درجه بدها تكون المي دييز (يعزف الأستاذ طارق النوتة)، أو الفا اللي هي نفسها الفا، المي دييز هي نفسها الفا، و هاي فا (يعزف الأستاذ طارق النوتة)، بدي أزيدها نص درجه بدها تصير بالإصبع الرابع (يعزف الأستاذ طارق النوتة)، بنسميها فا دييز، هاي دو (يعزف الأستاذ طارق النوتة)، بدي أزيدها نص درجه بدها تصير بالإصبع الرابع دو دييز، هاي دو (يعزف الأستاذ طارق النوتة)، بدي أنقصها نص درجه بتصير بالإصبع التاني (يعزف الأستاذ طارق النوتة)، دو بي مول أو سي ناتشورال، هاي السي (يعزف الأستاذ طارق النوتة)، إذا نقصناها نص بدها تصير (يعزف الأستاذ طارق النوتة) سي بي مول، فمعناها شفنا إحنا كيف العلامات و لكنهم كلهم بيدورو حول النغمات الناتشورالز زي اللي هم الطبيعيين، زي دو ناتشورال (يعزف الأستاذ طارق النوتة)، راي ناتشورال (يعزف الأستاذ طارق النوتة)، مي ناتشورال (يعزف الأستاذ طارق النوتة)، فا ناتشورال (يعزف الأستاذ طارق النوتة)، صول ناتشورال (يعزف الأستاذ طارق النوتة)، لا ناتشورال (يعزف الأستاذ طارق النوتة)، سي ناتشورال (يعزف الأستاذ طارق النوتة)، أو بيكار كله بيكار، و دو ناتشورال (يعزف الأستاذ طارق النوتة)، أو بيكار، نيجي نتطلع في عندي أنواع لعلامات التحويل، أول إشي علامة تحويل دائمه و تأتي بعد المفتاح مباشره قبل دليل الزمن الكي سيغنتشر، الكي سيغنتشر هادا هو نفسها اللي بنسميها علامة التحويل الدائمه و يكون مفعولها على كل القطعه، شو يعني هادا الحكي؟ نيجي نتطلع، حاطط عندي علامة فلات أو اللي هي نفسها البي مول، بتقطع السطر التالت على المدرج، إحنا بنعرف إن النغمه اللي موجوده على السطر التالت في المدرج هي نغمة السي، اللي هي هون (يعزف الأستاذ طارق النوتة)، لما بيجي بيحطلي علامة فلات أو اللي هي نفسها بي مول معناها كل السي لازم تكون بي مول بالقطعه، يعني أي سي بتصادفني لازم أعزفها بي مول ضمنياً، يعني مثلاً إذا إجتني هون سي، هاي السي التغت، بطلت هاي الناتشورال صارت البي مول (يعزف الأستاذ طارق النوتة)، هون أنا في عندي سي، إلتغت عندي هاي السي صارت السي بدي أعزفها بي مول (يعزف الأستاذ طارق النوتة)، بدي أعزف السي بي مول بكل المقطوعه، فنيجي نتطلع المازورا الأولى ما فيها ولا سي، المازورا التانيه فيها تنتين، شايفين هاي السي، بعدين في عندي كمان سي، هلأ بدي آجي أحكي شغله كمان هي مرتبطه بدرسنا السابق، شفتوا الذيل نزل لتحت، راح تسألوني ليش الذيل هون نزل لتحت؟ هون راح أحكيلكم شغله، القاعده بتحكي، بعد السطر التالت يكتب ذيل النوته للأسفل، ليش؟ عشان نسهل على القارئ، يعني بدل ما تكون، تخيلوا لو إحنا ضلينا نحط كل الذيل للأعلى للأعلى، راح يصير عملية القراءه راح تطلع عن المدرج الموسيقي الخمس أسطر، فإحنا بنحاول دايماً تنكتب النوته بس في خلال هدول الخمس أسطر كعمليه تنظيميه، فالنغمه على السطر التالت بنقدر نكتبها يا إما للأعلى يا إما للأسفل بس بعد السطر التالت إجباري تكون كلها للأسفل، مشان الذيل يكون ضمن المدرج الموسيقي، و في عندي آخر مازورا بهادا التمرين اللي هي كمان عندي علامة السي و لازم أعزفها بي مول، يعني بدل ما أعزفها هون بدها تكون هون، معناها سي قرار مش جواب و لكن خلص علامة السي بي مول صار مفعولها لكل المازورا، العلامات التانيه اللي هي علامات التحويل المؤقته و تأتي ضمن القطعه الموسيقيه و يكون مفعولها ضمن البار الواحد فقط، هاي اللي بنسميها الأكسيدنتلز، يعني نيجي نتطلع، أول مازورا ما عندي علامات تحويل، المازورا التانيه حاطط فا دييز عند أول وحده، هاي مفعولها بيكون لكل المازورا فإذا إجت كمان عندي فا إجاري تكون دييز، فنيجي نتطلع أول فا دييز حط عندها صول بعدين الفا اللي بعدها لازم تكون دييز، نيجي نتطلع على المازورا التالته، لا بعدين فا، ما حط عندها ولاعلامة تحويل و ما كان في عندها ولا علامة تحويل تعطيها الأثر فهون صارت عندي الفا ناتشورال بترجع ناتشورال، المازورا اللي بعدها اللي هي القبل الأخيره عندي علامة السي بي مول، فبكون مفعولها لهاي المازورا، آخر مازورا موجود عندي سي بس مش محطوط عندها ولا إشي فراح ترجع سي ناتشورال، هاي بالنسبه لعلامات التحويل اللي هي بعديها راح نبلش نشتق منها المقامات و راح تشوفوا كيف راح تبلش تظهر عندي قبل كل قطعة." 

عن المدرب
طارق الجندي
طارق الجندي
طارق الجندي: من مواليد عمّان 1983 ، بدأ بدراسة العود بسن الحادية عشرة من عمره عندما التحق بالفرع التحضيري في الأكاديمية الأردنية للموسيقى. تتلمذ على يد العديد من الأساتذة الأردنيين و العرب. عام 2007 أكمل دراسته الأولى بتخصص الهندسة الكيميائية من جامعة العلوم والتكنولوجيا الأردنية، وحصل بعدها على منحة دراسية و أكمل دراسته الموسيقية بتخصص الأداء على آلة التشيلو في المعهد الوطني للموسيقى، و التحق بأوركستراعمّان السيمفوني عام 2008 كعازف تشيلو. عام 2008 شارك في مسابقة العود الدولية التي أقيمت بجامعة الروح القدس-الكسليك / لبنان و حصل على المركز الثاني. عمل و شارك مع العديد من الفرق الموسيقية، و أصدر خمسة ألبومات: بينَّ بينْ، ترحال، ألحان من طفولتي، موسيقى من عمّان، و صور. له مؤلفات و دراسات لآلة العود، مؤلفات للتخت الشرقي ، موسيقى مسرحية، وأغاني للأطفال. عام 2013 حصل على الجائزة الخاصة في مهرجان المقام الدولي الذي أُقيم في مدينة باكو/ أذربيجان. عام 2015 حصل على المركز الثاني في مسابقة المقام الدولية الذي أُقيمت في مدينة باكو/ أذربيجان. أنهى دراساته العليا بالجامعة الأردنية ، يعمل كمحاضر غير متفرغ لمادة النظريات الموسيقية و مدرّس لآلة العود لفرعي التحضيري و البكالوريوس في الأكاديمية الأردنية للموسيقى، و مدرس آلة العود بالجامعة الأردنية. له ورشات عمل سنوية بالأردن بالتعاون مع مؤسسات المجتمع المدني و الهيئات الحكومية المعنية بالشأن الثقافي داخل العاصمة و خارجها. عام 2016 تمّ تكريمه من وزارة الثقافة الأردنية كفنان معاصر و زرع شجرة تحمل إسمه بغابة الإبداع. عام 2016 حصل على جائزة الإبداع الموسيقي من وزارة الثقافة الأردنية. شارك و مثل الأردن كعازف منفرد أو كعضو في فرقة في العديد من المهرجانات الدولية و المشاريع الثقافية في كل من: سوريا، لبنان، فلسطين، البحرين، قطر، سلطنة عُمان، الإمارات العربية المتحدة، المغرب، أذربيجان، تركيا، إنجلترا، إسكوتلندا، إيطاليا، فرنسا،اليونان، لاتفيا، السويد، هنغاريا، اليونان، النمسا، ألمانيا، النرويج والصين.

شارك اعزف. ساعد غيرك يبدأ الرحلة!

أهدِ تجربة اعزف لشخص مميز!