يتحدث ريبال هنا عن أجناس مقام الصبا بالتفصيل و يعطي أغنية هو صحيح الهوى غلاب لسيدة الغناء العربي كوكب الشرق.

ريبال خضري:

"هلأ لو إجينا نحكي عن أبعاد مقام الصبا و عن أجناسه.

طبعاً إحنا حكينا عن الأبعاد المره الماضيه راح نرجع نتزكرها لحتى نقدر نبني على أساسها الأجناس، أنا عندي من الراي للنص بي مول أنا عندي تلات أرباع بعد أو ثري كوارترز تون، بعدين عندي كمان نفس الإشي من البي نص بي مول للفا، من الفا للصول بي مول أنا عندي نصف بعد، من الصول بي مول للا أنا عندي بعد و نصف، بعدين عندي من اللا للسي عندي نصف بعد، من السي للدو أنا عندي بعد، و من الدو للراي كمان أنا عندي بعد، هلأ أكتر النظريات... أكتر النظريات بتقول إن مقام الصبا هو عباره عن جنسين، الجنس الأولاني هو راي مي نص بي مول ياللي هي تلات أرباع بي نص بي مول فا، تلات أرباع فا صول بي مول بعد نصف بعد، بالتالي طريقة التصنيف هي تلاته تلاته تنين أو تلات أرباع تلات أرباع نص، و هادا بيكون أول جنس اللي هو جنس الصبا على الراي، هلأ الجنس التاني راح يكون عندي جنس مقام الكرد ياللي هو من اللا، أنا عندي لا سي بي مول دو راي، طبعاً برجع بذكر إن أنا لما بدي إبني مقام فرعي على الصبا لازم يكون الراي و المي نص بي مول و الفا و الصول بي مول ثابتين غير قابلين إن هنن يتغيروا، هادا بالنسبه لأنا اللي بدي إياه بالنسبه لطريقة الأجناس، هلأ في البعض بيقول إن أنا ممكن يكون مقام الصبا هو عباره عن تلات أجناس اللي هو الراي مي نص بي مول فا صول، هادا أول جنس اللي هو جنس الصبا، الجنس التاني اللي هو فا صول بي مول لا سي ياللي هو جنس الحجاز، جنس حجاز فا، و التالت ياللي هو جنس كرد من اللا، يعني تلات أجناس متداخله مع بعضها أثناء ما أنا عم بغني، يعني أنا إذا بدي أقول (يقرأ الأستاذ ريبال التمرين قراءة ايقاعية).

هاي الحجاز هلأ (يقرأ الأستاذ ريبال التمرين قراءة ايقاعية)، عملت الكرد هلأ عم بنزل (يقرأ الأستاذ ريبال التمرين قراءة ايقاعية)، فإذاً أنا في عندي أكتر من صيغه و أكتر من طريقه، بس الطريقه الأكثر شموليه و الأكتر تعميماً هي إن أنا عندي جنس صبا على الراي و جنس آخر كرد على اللا، الأغنيه اليوم اللي راح نحكيها عن مقام الصبا أو راح نتعرف فقط على بدايتها، هي أغنيه لسيدة الغناء العربي كوكب الشرق أم كلثوم، حنتعرف سوى على أغنية هو صحيح الهوا غلاب (يعزف الأستاذ ريبال التمرين) حعزف الموسيقى بالأول بس نحنا عالنوت حنفوت مع المغنى مباشرةً (يقرأ الأستاذ ريبال التمرين قراءة ايقاعية).

طبعاً أنا كنت عم بغنيها بطبقه أوطى بشوي من طبقتي كرمان نعطي تو أوبشنز نعطي للمغنيين اللي صوتهن باس يقدروا يغنوها بسهوله أكتر."