تدريبات على لفظ كلمات القصيدة قبل الغناء.
ريبال خضري:
"أنا هون كان الموضوع جداً طبيعي، حتى يمكن ما حسيت كتير بانتقالات لإن الملحنين الأخوين الرحباني حاولوا إن هنن يخلوا الكلام و اللحن يخلوا اللحن ينتقل من مقامات متقاربه كتير لبعضها البعض، رحنا على عجم الفا، رحنا على (يعزف الأستاذ ريبال التمرين).
رحنا على كرد اللا، أكتر انتقالاتنا كانت من هادا النمط، هلأ راح إيجي أبلشأنا بدي إحفظ الأغنيه من الأول، طبعاً أنا راح إستعرض بس البدايه بس، لملمت ذكرى لقاء الأمس، راح إستعرضها معكم بدون عود، أنا بدي إحفظ الأغنيه، أول شعله راح أعملها إني أنا راح إتدرب على لفظها بشكل سليم، أول شي أنا راح آخد قلم راح إستعمل هادا القلم، راح أخلي القلم موجود بتمي بهالطريقه أعض عليه أفوته للأقصى الأقصى، و راح أجرب أقول أغنية لملمت ذكرى بدون غنى بس راح أدرب اللفظ أكتر يعني (لملمت ذكرى لقاء الأمس بالهدب و رحت أحضنها في الخانق التعب أيدي تلوح من غيب و تغمرني بالدفء و الضوء بالأقمار بالشهب ما العصافير تدنو ثم تسألني أهملت شعرك راحت عقدة القصب وفوفها بريق في تلفتها يثير بي نحوها بعضاً من العتب).
بهاي الطريقه أنا بكون شديت الحروف أكتر، حاولت إني أخلي دماغي يستوعب إن كل حرف إله مكان باللفظ، مش مجرد إني أنا بدي أقول الحرف و خلص أزته، لإن دايماً أنا بعرف عملية اللفظ بتتحمل من الدماغ ينبعت إشاره إن هلأ حرف باء راء ألف كاف نون، بهاي الطريقه هلأ لما بتكون الإشاره كتير سريعه أو لما الفك بيتعود إن هو يغني باستكسال أو باستسهال فما بيلفظ الحرف بشكل طبيعي... مش بيعطيه حقه، فأنا لما بتدرب بهالطريقه بإني أحط قلم فأنا عم بحاول ألفظ الحرف برغم صعوبة اللفظ لإن في إشي معلق بالفك أو في إشي بيحاول يخلي الفك ما يغلق بشكله الصحيح، فهادا الإشي هادا التمرين على هيك نمط من القصائد مره مرتين تلاته راح يكون كتير مفيد إلنا، خلصنا هلأ من تمرينا على اللفظ، هلأ بدي إيجي لإني أنا إتمرن على اللحن، طبعاً نحنا سابقاً حكينا على هالنقطه و راح إرجع أعيدها، أنا لما بدي إحفظ أي قصيده، بسمعها بالبدايه مره تنين تلاته أربعه لأحسها، لأحس كيف الإنتقالات، هلأ شغله مهمه طالما نحنا صرنا بنعرف أو فاهمين إلى حدٍّ ما إنتقالات المقامات، كتير مهم إني أنا أجرب أسجل النوته عندي وين في إنتقالات مقاميه عم بتصير، يعني أنا هون كنت بلشت بكرد الراي، هون رحت على عجم الفا، عند مثلاً مقطع كذا كتبت إن أنا تحولت لحجاز كزا، بهاي الطريقه أنا بسهل علي الحفظ لإن باللا وعي تبعي بصير بفهم إن هون في تغيير باللحن هون في تغيير باللحن، اللحن مش متقارب لبعضه، هلأ هاي تاني شغله بتسهل علي بإني أنا إكتب عالورق هادا الكلام."
