الدروس
02:43:79 ساعة
35 الدروس
الغناء
مقام البيات
ادخل بريدك الإلكتروني لتبدأ مجاناً الآن
بالضغط على الزر اعلاه اوافق على شروط واحكام موقع إعزف
نص الحوار

يتحدث الأستاذ ريبال عن مقام البيات , تحديداً بيات الدرجة الثانية من ري , و يراجع تعريف المقامات المسيكة.  


ريبال خضري:


"أما بالنسبه للمقام اللي راح نتناوله بهاي المجموعه من الدروس القادمه حنحكي عن مقام البيات، أول شغله نحنا حكينا إن مجموعة المقامات اللي نحنا راح ناخدها هي مقامات مبنيه على الدرجه التانيه فبالتالي بيات اللي راح نشتغل عليه هو بيات الدرجه التانيه بيات الراي، هو البيات المتعارف أكتر، لو شفنا النوت قدامنا راح ننتبه إن البيات جدّاً جدّاً مشابه للكرد و لكن الفرق بين الكرد و البيات هو اختلاف نوته صغيره، متل الفرق بين الكرد و الحجاز، هلأ نحنا بالـ... أول شغله بدي إنتبه عليها إن البيات هو من المقامات اللي بنسميها المقامات المسيكه أو المقامات الشرقيه، ياللي هي لا تعزف إلا على آلات شرقيه متل العود متل الفايلن متل... متل... متل الناي متل القانون متل غيرها، تمام، أما بالنسبه للآلات الغربيه فمش حيقدر يعزف هاي النوتات، لإن هاي النوتات في بعض النوتات أو في نوته وحده بتكون نصف بي مول (يعزف الأستاذ ريبال التمرين).


حيكون عندي بالأول راي (يقرأ الأستاذ ريبال التمرين قراءة ايقاعية)، لاحظنا كيف المي نص بي مول (يقرأ الأستاذ ريبال التمرين قراءة ايقاعية)، لاحظنا المقام فيه حزن، فيه طابع عربي، مقام البيات... البيات كتير مربوط ببلد العراق بشكل عام، كتير أغاني عراقيه بتكون موجوده أو مصنوعه على مقام البيات، حأرجعع أعيده كمان مره، حنعيده سوى (يقرأ الأستاذ ريبال التمرين قراءة ايقاعية).


مقام البيات هلأ متل مانا شايفين عنا المسافه بين النوتات كتير متشابهه مع مقام الكرد، بس بالبدايه أنا عندي بدل بالكرد كانت المي بي مول، هلأ بالبيات حتكون المي نصف بي مول أو بالإنغلش الإي حتكون هاف فلات، نص أو سيمي تون، تمام، مو لسيمي تون حتى أقل يعني، نحنا بنحكي على كوارتر تون، بدي أنتبه للأبعاد الموجوده عندي ، أنا عندي بين الراي و المي نص بي مول عم بيكون عندي تلات أرباع بعد، بعدين عندي بين المي نص بي مول و الفا عم بيكون عندي كمان تلات أرباع بعد، بعدين بين الفا و الصول عم بيكون عندي بعد، معناتها أنا البيات أنا هو عباره... تركيب جنس البيات كأبعاد عندي تلات أرباع بتلات أرباع ببعد، و هادا دليل على إنه سلم شرقي أو سلم فيه سيغا، لإن بس يكون عندي تلات أرباع يعني إجباري وحده من النوتات آخده إما نص دييز أو نص بي مول، هلأ بنطلع لفوق حنلاقي إن بين الصول و اللا عندي بعد، بين اللا و السي بي مول عندي نصف بعد، بين السي بي مول و الدو عندي بعد، و بين الدو و الراي عندي بعد.


بدرسنا القادم راح ناخد تمارين على مقام البيات، راح نجرب ننتقل بأغنيه من أغاني البيات و نتعرف عليها أكتر و بعدن منها راح نتعرف على مشتقات مقام البيات، شكراً كتير بشوفكن الدرس الجاي، باي."

عن المدرب
ريبال خضري
ريبال خضري
فنان سوري .. - له العديد من الأغاني الخاصة مثل " بلدي عم يوجعني – يا بيتي شو اشتقتلك - شوية حكي – الله معك – حبيبي انا " - له ثلاثة ألبومات وهي 1- " قصائد سياسية " من انتاج الصندوق العربي للثقافة والفنون التابع لجامعة الدول العربية وهو عمل من كلمات الشاعر الكبير احمد مطر والحان وتوزيع باسل رجوب .. 2- " توشيحات " : الخاص بفرقته فرقة " التوشيح الحديث " التي طرح فيها ريبال موشحات بأسلوبه الخاص و سيقوم بتقديم البومات دورية لها . 3- " شوية حكي " قدمه ريبال مع عام 2010 من انتاج شركة المورد الثقافي - ريبال خريج المعهد العالي للموسيقا في سوريا – دمشق قسم الغناء الشرقي يلعب ألتي البيانو والعود ... - حاصل على ماستر كلاس من جامعة الكسليك عام 2010 - حاصل على 1- وعلى الجائزة الأولى كأفضل صوت عربي ضمن ملتقى الاصوات الجميلة الذي تم تنظيمه من قبل المجمع العربي للموسيقى في كلية الكسليك – لبنان ونال على اثرها ماستر كلاس من الجامعة . 2- الجائزة الثانية كأفضل صوت عربي ارتجالي في مهرجان الموسيقى العربية في القاهرة السابع عشر 2008 - ريبال حاليا مدرس الغناء في المعهد الوطني للموسيقا في عمان ومدرس مادة الغناء العربي في الكونسرفاتوار الأردني ومدرب جوقة عمون للغناء الكورالي الحديث . - قدم حفلات كمغني منفرد ذائع الصيت مع فرقته الخاصة ومع اهم الفرق والاوركسترات العربية والعالمية من مثل " الأوركسترا السمفونية السورية – أوركسترا عمان الفلهوارموني – أوركسترا عمان سمفونيتا – كورال أوزنابروغ الألماني – فرقة طرب .. " وذلك في اثر من عشرين مدينة عربية وعالمية في " المانيا – ايطاليا – فرنسا – الصين – أذربيجان – تركيا – الامارات – مصر – السودان – تونس وغيرها ... "

شارك اعزف. ساعد غيرك يبدأ الرحلة!

أهدِ تجربة اعزف لشخص مميز!