يقارن ريبال بين المقامين و ينظر الى الأجناس المشتركة و يتحدث عن مصطلح العقد.

ريبال خضري:

"الفارق الوحيد إن أنا بمقام السيكاه كان عندي... كان عندي الجنس الأدنى هو بنسميه جنس سيكاه اللي هو تلات أرباع ببعد ببعد، أما الجنس الأعلى فهو جنس رست من الصول اللي هو بعد بعد تلات أرباع، عفواً بعد تلات أرباع تلات أرباع بعد، فإذاً أنا عندي هون جنسين متداخلين، مقام الهزام هو من المقامات الوحيده ياللي فيها أجناس متداخله، هلأ العلماء الموسيقيين أو المنظرين الموسيقيين بيختلفوا، شي بيقول إن أنا عندي هادا ما بنسميه مثلاً المقطع الأولاني ما بيسموه جنس بيقلك أنا هادا بدي أسميه عقد مثلاً، هوعباره عن فقط تلات نوتات (يقرأ الأستاذ ريبال التمرين قراءة ايقاعية)، ما بيسميه (يقرأ الأستاذ ريبال التمرين قراءة ايقاعية).

بيقلك لأ هادا عقد و أنا شخصيّاً ميال لهادا الرأي لإن السيكاه من المقامات اللي سهل إن هو دغري ينفهم من أول تلات نوتات ما بينعاز حتى إني أنا أكفي التيتراكورد للرابعه، بينما القسم الرابع فهو من الصول لا سي دو، في البعض بيقول مثلاً إن هادا عباره عن طبع هو عباره عن خمس نوتات ورا بعضهن مش أربعه، يعني ما بيكفيه أربعه، بس نحنا حنمشي بشكل مبسط لحتى ما نضيع، حنعتبر إن هن جنسين بي نص بي مول فا صول لا، و الجنس الآخر هو صول لا سي دو سي نص بي مول، هلأ لو أنا إجيت بدي إحكي عن الهزام، راح أبدل فقط الجنس الأعلى ياللي هو جنس... جنس رست من الصول، راح إتعامل معه على اعتباره جنس حجاز من الصول، تمام، فحيصير عندي بالأول مي فا صول، هو ما عاد فيني أقول جنس سيكاه، لأ بدي أقول عقد سيكاه، ليه؟ لإن بدي إختصر اللا لإن اللا بدها تصير بي مول باعتبار إن صرنا حجاز صول، فبده يصير... حنشوف الهزام قدامنا (يقرأ الأستاذ ريبال التمرين قراءة ايقاعية).

لاحظنا إن هادا المقام كتير أقرب لإدني كتير أقرب لطريقة إستماعي للمقام، أنا هون عندي إذاً عقد من السيكاه مبني على درجة المي نص بي مول، بالإضافه لجنس خلينا نسميه جنس سيكاه... جنس حجاز على درجة الصول، لو أنا بدي إنتبه إن الأغنيه اللي أنا غنيتها بالأول اللي هي لسيدة الغناء العربي أم كلثوم، أغنية سيرة الحب، هي مبنيه على مقام الهزام، هاي بالنسبة للفرق بين هدول المقامين بينات بعضهن، هلأ راح نتداول أغنيه كتير بسيطه على مقام الهزام ياللي هي أغنية موسيقار الأجيال محمد عبد الوهاب، أغنية قللي عمللك إيه قلبي، راح نبتدي فيها بس شوي لحتى نقدر نشوف كيف تقطيع هادا المقام، كيف أنا عم بطبق مقام الهزام على الغناء (يقرأ الأستاذ ريبال التمرين قراءة ايقاعية).

هلأ بالأغنيه بعدين راح يستعرضلي أكتر من مقام، يعني حيفوتلي بـ (يقرأ الأستاذ ريبال التمرين قراءة ايقاعية)، عم بيعطيني حجاز، بعدين بيرجع بيختملي (يقرأ الأستاذ ريبال التمرين قراءة ايقاعية)، عطاني كرد على الصول، جنس كرد على الصول ليخلصني آخر شي مره أخيره بالهزام (يقرأ الأستاذ ريبال التمرين قراءة ايقاعية)، بيجي للمقطع اللي بعده التالت بيعطيني إحساس... أو بيعطيني مقام البيات، جنس بيات على الصول و بيرجع بنفس الطريقه بيروح على كرد الصول و بيختملي بالـ... بيختملي بالسيكاه أو بهزام المي نص بي مول (يعزف الأستاذ ريبال التمرين).

آخر مقطع بيعطيني جنس رست على الصول كإن أنا عم بغني سيكاه، متل ما بنتذكر سيكاه... سيكاه من تحت و رست من فوق فكإن عم بيعطيني مقام رست صول لحتى آخر شي يرجع يختملي اياه بجنس صغير بيات و بالنهايه بيكون عم بيخلصني بهزام المي نص بي مول، هيك أخدنا فكره عامه عنها، طبعاً لحتى نقدر نفهم كلامي أكتر لازم نكون سامعين الأغنيه من أول بارت إلها لآخر بارت لنقدر نفهم كل مقطع بأي مقامات عم بيروح.

هاي كان كل شي لليوم، حكينا فيه عن مقام السيكاه و الهزام، الدرس القادم راح نتناول موشح على مقام الهزام لحتى نجرب نلفظ القصائد مع مقام الهزام بشكل أفضل. شكراً كتير بشوفكن بدرس قادم، باي."