يبرز الفنان ريبال الخضري نقطة مهمة هنا متعلقة بالموسيقى العربية و ثلاثة أرباع النوتة في المقامات المختلفة. ينتقل بعد ذلك ريبال الى تعريف مقام الصبا بأبعاده.
ريبال خضري:
"في مفهوم كتير مهم حابب إني أنا أحكي عنه قبل ما إنتقل للمقام الجديد ياللي راح نتعرف عليه، في نحنا حكينا عن السيمي تون أكيد من قبل و حكينا عن الكوارت تون، في كتير ناس بتسألني إن الموسيقى العربيه عادةً مبنيه على الربع، للحقيقه لحتى نكون منصفين، الموسيقى العربيه منها مبنيه على الربع و إنما مبنيه على التلات أرباع، يعني نحنا كتير قليل إنو نحنا نسمع ربع بضمن الأغاني و إنما ممكن نسمع تلات أرباع، ليش؟ لإن الربع هو إشي كتير كتير كتير قريب ليعني النونتين بيصيروا كتير قراب عبعض يعني عم بحكي (يقرأ الأستاذ ريبال التمرين قراءة ايقاعية).
إشي كتير كتير قريب لبعضه فبالتالي قليل لنستعمله، ممكن نلاقيه ببعض المقامات بشكل مرور الكرام يمر، و لكن الحقيقه الأكتر إن نحنا بنستعمل تلات أرباع... تلات أرباع تون، قليل ما نستعمل أقل من تلات أرباع تون بالنسبه للموسيقى العربيه و هادا اللي بيميزها، و إذا لاحظتوا إحنا بالبيات كان عنا البعد بين الراي و البي نص بي مول هو تلات أرباع، ما مرق علينا لحديت الآن مقام بيكون فيه ربع بعد، إلا ممكن يمرق معنا بنهاية الكورس الكورسات لما نحنا نحكي عن مقام السيغا نقول إن مقام السيغا مثللاً بعض المناطق ممكن يمرق فيه ربع بس بيكون يعني عرضي بيكون بسيط، ما بيكون إن هو ثابت و أصيل ضمن المقام، المقام اللي حنتعرف عليه اليوم هو مقام الصبا، مقام الصبا هي كلمة الصبا بحد ذاتها تعني الريح، المقصود بكلمة الصبا هي الرقه و هاي الكلمه تحديداً إجت من العصر الأندلسي، بعصر الأندلس اللي الكتب بتقول إن مقام الصبا كان بيسموه مقام بكاء الرجال، على قد ما هو مقام جدّاً حزين يعني حتى بالموسيقى التصويريه بالعالم العربي لما بدهم يحطوا بالمسلسلات أو بغيره كتير بيهتموا إن لما بيكون في مقطع كتير حزين كتير حزين يحطوا الصبا، فأي ثينك أعتقد إن راح... راح يكون مقام الصبا من المقامات السهله علينا كإستيعاب، بنفس الوقت مقام الصبا هو من المقامات القريبه لمقام البيات بشكل كتير كبير، لو إجينا إن نحنا بدنا نتعرف على مقام الصبا، حنقول (يقرأ الأستاذ ريبال التمرين قراءة ايقاعية).
لاحظتوا كيف المي كانت نص بي مول و الصول كانت فول بي مول (يقرأ الأستاذ ريبال التمرين قراءة ايقاعية)، كان عندي لا سي دو راي فوق، و تحت راي مي نص بي مول فا صول بي مول، إرجع أعيده أنا و اياكن حنطلع و ننزل فيه (يقرأ الأستاذ ريبال التمرين قراءة ايقاعية)، طبعاً سي بي مول (يقرأ الأستاذ ريبال التمرين قراءة ايقاعية).
من أكتر المقامات حزناً من أكتر المقامات، و صراحةً في ملاحظه يمكن أنا بقدر أقولها إن يعني أكتر المغنيين لما بيغنوا أغنيه على الصبا، مغنيين الطرب أو المغنيين المطربين بتقدي صراحةً هاي الأغنيه لإن عنجد ينجحوا، يعني كتير من الأسماء ياللي نحنا بنعرفها صراحةً نجحتهن أغنيه أو وصلتهن للعالم العربي، ممكن يكونوا ناجحين من قبل ببلدانهن بس وصلوا للعالم العربي بأغنيه من مقام الصبا، إذا أنا إجيت بدي أعطي أمثله على مقام الصبا عالأغاني راح أقول هوا صحيح الهوا غلاب للسيده أم كلثوم (يقرأ الأستاذ ريبال التمرين قراءة ايقاعية)، الأماكن لمحمد عبده، راح أقول يا أمي يا أم الوفا لسعدون جابر، راح أقول (يعزف الأستاذ ريبال التمرين).
في مقطع من أغنيه للسيده ورده بفي يوم و ليله لما بتقول موال قالولي أهل الهوا (يقرأ الأستاذ ريبال التمرين قراءة ايقاعية)، كمان أنا هون عم بحكي عن مقام الصبا، فإذاً مقام الصبا من المقامات الكتير سهله ياللي أنا ممكن إني إستذكرها و ممكن إني أنا... بصراحةً أنا طلابي دائماً مقام الصبا من أكتر المقامات اللي...
يعني بينحفظ بإدنهن بشكل سهل بدون ما إنهن يتابعوه على النوته، نحنا اليوم تعرفنا بشكل مبسط على مقام الصبا، الدرس القادم راح ناخد تمرين على مقام الصبا، راح نبتدي نتفرع أكتر بمقام الصبا.
شكراً إلكن بشوفكن الدرس الجاي، باي."
