يتحدث الأستاذ ريبال عن المقامات الفرعية لهذه المقامات بالتفصيل مثل المقام السيكاه البلدي.
ريبال خضري:
"بيصفى آخر شغله إني أنوه شو هي... شو المقامات اللي بتطلع عن مقام الهزام، هلأ أنا لأول مره راح أجرب إني إحكي عن مقامات بدون أسماء.
طبعاً إنتوا لو فتحتوا على الإنترنت أو لو عملتوا أي سيرتش، راح تلاقوا إن أسماء المقامات كتيره، يعني... يعني يمكن المقامات الفرعيه الموجوده التابعه للمقامات الأساسيه أكتر من أربعميه و تسعين مقام، في منها تصوير، في منها بس إختلاف درجه متل ما حكينا تصوير، في منها إختلاف بالأجناس، في منها إختلاف بطريقة العمل، زي إذا عم بنحكي على كرد الراي بدل ما أعمل كرد راي و نهاوند صول أنا فيني و أنا عم بغني أعملها كرد راي و نهاوند لا مثلاً، فبصير عندي إختلاف بأسلوب الغنى فبتغير إسم المقام متل ما شفنا، فنفس الإشي هلأ هون أنا عندي السيكاه عندي الجنس الأساسي سيكاه، هلأ أنا لو غيرت الجنس الأعلى و اعتبرته صار بيات صار عندي مقام جديد، و لو غيرت الجنس الأعلى و اعتبرته صبا كمان صار عندي مقام جديد، لو غيرت الجنس الأعلى و اعتبرته أعجم كمان صار عندي مقام جديد، فإذاً أنا تغييري للجنس الأعلى هو ياللي بيخليني آخد مقامات جديده، هلأ في مقام جداً مشهور من المقامات المتفرعه من مقام السيكاه، اللي هو مقام السيكاه البلدي، و يضاف إلى ذلك كمان مقام معروف كتير تنيناتهن راح أحكي عنهن اللي هو مقام المستعار، مقام السيكاه البلدي هو عباره عن مقام استعمله أو يقال إن أول من استعمله هو مقام هو السيد هو محمد عبد الوهاب، فكره مقام السيكاه إن أنا على أي درجه أنا حابب أعد، أي درجه حبيت إني أنا إستقر بالغنى، إني إقدر إعمل سيكاه، هلأ عملياً السيكاه هو السيكاه، السيكاه البلديه هو سيكاه ليس مشتق من الهزام قد ما هو مشتق من السيكاه، متل وين؟ متل لما هو بيقول بكل ذاك الليل (يقرأ الأستاذ ريبال التمرين قراءة ايقاعية).
نحنا هون عم بنحكي عن بيات، هلأ بالمقطع التاني (يقرأ الأستاذ ريبال التمرين قراءة ايقاعية)، هون محمد عبد الوهاب استقر على الصول و عمل إرتجالات، من ضمن الإرتجالات الأساسيه إن هو عرج على السيكاه البلدي (يقرأ الأستاذ ريبال التمرين قراءة ايقاعية)، أنا كتير بدعيكم إن تسمعوا هادا المقطع بعد... بعد ما يشتغل أكتر من مقام راح يستقر يقول (يقرأ الأستاذ ريبال التمرين قراءة ايقاعية)، صعوبة هادا المقام إن ما في آله موسيقيه بتقدر ترافقك فيه و إنتي عم بتغني، لإن إنتي عم بتشتغل على سيكاه مبنى على علامه طبيعيه فبالتالي كل العلامات الباقيين حيكونوا مش طبيعيين، يعني إحنا قلنا إن السيكاه مميز بإن هو أول درجه و آخر درجه هن نص بي مول، بالتالي أنا كهارمونيك بيكون صعب عليّ ليش؟ لإن البدايه عم بتكون مش نص بي مول، هلأ أما السيكاه البلدي فبيكون بالعكس تماماً، بيكون عم بيبتدي بدرجه طبيعيه أما باقي الدرجات كلياتها أو بشكل عام أكترها بتكون درجات غير طبيعيه، إما نص بي مول أو نص دييز كل الدرجات، مشان هيك بيكون يعني ما بنقول صعب بس تقريباً كتير صعب... كتير صعب إن آاه موسيقيه تقدر ترافق مغني عم بيرتجل أو عم بيشتغل على هادا المقام، الفرع التاني اللي ممكن نحكي عن مقام المستعار اللي هو فرع مبني على لعبه أو آلية العمل، أنا لما عم بقول أنا عندي مي نص بي مول فا صول لا بي مول سي بي كار دو راي، أثناء ما أنا عم بلعب بالمقام أو عم برتجل ممكن لما أنا برسى عالمي نص بي مول نغير شوي بالمي نص بي مول نروح شوي عالراي دييز إرجع للمي نص بي مول، متل وين؟ متل لما أنا إيجي أقول (يقرأ الأستاذ ريبال التمرين قراءة ايقاعية).
يعني لأول مره أنا تعاملت مع الربع بالموسيقى العربيه، أنا دايماً كنت متل ما حكينا عم بتعامل مع التلات أرباع هلأ عم بتعامل مع الربع (يقرأ الأستاذ ريبال التمرين قراءة ايقاعية)، بس ما في... ما في تعديلات كتير غير هاي، على هاد الأساس نحنا بنسميه مستعار على اعتبار إن استعرنا إشي خفيف من... مانه موجود بالمقام أساساً و مانه موجود حتى بآلية العمل تبع المقام، هادا كان كل شي بالنسبه لمقام السيكاه مقام الهزام حاولت إن ألخص أكبر كم من المعلومات اللي أنا بعرفها، سامحوني إذا أصرت ببعض المناطق أو إذا نسيت بعد بعض النقاط أكيد راح نتحدث عن هادي المواضيع أكتر و عن مقام الهزام و باقي المقامات بدروس الكورسات القادمه شكراً كتير إلكن، باي."
