يتحدث الأستاذ ريبال هنا عن تأثير المناطق المختلفة على صوت الإنسان و أساليب الغناء.
ريبال خضري:
"(يقرأ الأستاذ ريبال التمرين قراءة ايقاعية)، مرحبا، أنا ريبال من إعزف دوت كوم.
اليوم الدرس أعتقد كتير من الشباب بالعالم العربي بيهتموا فيه و مهتمين يعرفوا عن تفاصيله، اليوم نحنا بدنا نحكي عن شو الفروقات بين... في كتير ناس بتيجي تقولي أنا صوتي بيلبق للرومانس بس صوتي ما بيلبق على الأغاني السريعه أو ما بيلبق عالأغاني الإيقاعيه أو ما بيلبق على... أو مثلاً أنا صوتي جبلي ما بيزبط عهادا الصوت، هلأ أنا عندي قناعه، يعني فترة التدريس الطويله اللي أنا عم بدرس فيها بالغنى، قناعتي بتقول إن كل صوت إلى حدٍّ ما حيكون مميز بمكانٍ ما من مناطق أو من أنواع الغناء العربي، و لكن ممكن إن هو يكون أقل بس إذا هو اتدرب أو إذا هو اشتغل عحاله ممكن إن هو يقارب هاي المنطقه، بس بالتأكيد هو في إشي خاص أو طبيعة صوت خاصه فيه.
هلأ شو السبب؟ إن المنطقه اللي هو عايش فيها كتير إلها دور، يعني مثلاُ الشخص اللي بيربى بجبل من وقت ما بيكون صغير أول شغله طبيعة الهوا من وقت ما بيكون صغير بيكون هوا بارد، فهادا الإشي بيخلي الحنجره تكون أتقل بيخلي الحبال الصوتيه تكون دائماً متصلبه أكتر، فبالتالي أنا لما بدي أغني بيصير الصوت عندي أتقل فبالتالي بيكون عندي بحه بالصوت و أنا عم بغني، هادا واحد من الأسباب، الأسباب التانيه اللي هو إن هو بيربى بمنطقه الجبل غالب وقته بيكون منطقه جرديه أو منطقه يعني الناس فيها ممكن تكون خشنه أكتر، طريقة الحياه فيها عفويه أكتر، ممكن طبيعة الصوت الناس اللي حوليك تكون طبيعة صوتهم (آاااه) (آاااه)، دائماً الصوت بيكون لتحت أكتر فبكون عم بيشد الصوت، فهو من وقت ما صغير بيكون عم بيقلدهم هنن كيف عم بيحكوا، منطقه إلها دور كتير كبير بكيف بيتشكل هادا الصوت، بس بالمقابل لما نحنا بندرس كيف نحنا عم بنغني و شو فروقات هاي الصوت، هادا الإشي كتير راح يساعدنا إن لو حبينا نغني رومانس أو لو حبينا نغني طرب أو لو حبينا نغني إشيا تانيه، أنا ابتديت بأغنيه لصابر الرباعي، أتحدى العالم، لحتى أقول إن الغنى الرومانس غالباً ما بيحتاج إن أنا أبذل كل طاقة صوتي، توضع الصوت بالغنى الرومانس أنا عم بحكي على صوت هادي، صوت إلى حدٍّ ما هو صوت حنجره خفيف، أنا عم بستعمل أبسط طاقة صوتي، عم بلفظ هلأ في دائماً مفهوم غلط إن و الله بالرومانس أنا ممكن إبلع الحروف و آكلها، خليها قاعده ثابته عندكن، ما في ممنوع بتاتاً بتاتاً إني أنا ما ألفظ غلط أو إني أنا أغير طريقة الحروف لمجرد إنو أنا غيرت نوعية الغنى، يعني ما بصير إن أنا (يقرأ الأستاذ ريبال التمرين قراءة ايقاعية).
هادا الإشي راح يكون بيجوز إنتي تقول إن عادي إن هادا رومانس، لأ، الشخص اللي عم يسمعك مش راح يقول هيك، راح يقول هادا مش عم بيعرف يلفظ، فضروري جدّاً إتقيد باللفظ بأي نوع من أنواع الغناء العربي، بس أنا بدي إرجع للرومانس صوتي لازم يكون هادي، فتحة تمي ما لازم تكون مغلقه، هادا كمان من الأغلاط الشائعه إن أنا عم بغني رومانس فأنا عادي إني أسكر تمي، لأ بالعكس، خلي صوتك مرتاح و افتح تمك مشان مت تعزب المايك... اللي عم بياخدلك الصوت أو تعزب الناس بإن هي تصير عم بتركز أكتر لتسمعك، هاي بالنسبه للغنى الرومانس."
